(បាងកក)៖ ជនរងគ្រោះ ៤០០នាក់ដែលបានស្លាប់​នៅក្នុងគ្រោះមហន្តរាយ​រលកយក្សស៊ូណាមិកាលពី​ឆ្នាំ២០០៤ នៅក្នុងប្រទេសថៃ​នៅមិនទាន់ត្រូវបាន​ បញ្ជាក់អត្តសញ្ញាណ​នៅឡើយទេ។ នេះបើតាមសម្តី​របស់មន្ត្រី​ប៉ូលិសថៃ​ ដែលចេញផ្សាយ​ដោយសារព័ត៌មាន Reuters នៅរសៀលថ្ងៃចន្ទ ទី២៦ ខែធ្នូ ឆ្នាំ២០១៦។

កាលពីជាង ១២ឆ្នាំមុន​ពោលគឺនៅថ្ងៃ​ទី២៦ ខែធ្នូ ឆ្នាំ២០០៤ គ្រោះរញ្ជួយដី​ដ៏មហិមាកំរិត ៩.១៥ រិចទ័រ ដោយបង្កជា​រលកយក្សស៊ូណាមិ​វាយប្រហារមកលើតំបន់​មហាសមុទ្ទឥណ្ឌា ក្នុងនោះមានប្រទេស ថៃ ឥណ្ឌូណេស៊ី ឥណ្ឌា និង ស្រីលង្កា បានទទួលរងគ្រោះខ្លាំងជាងគេ។ ជាក់ស្ដែងគ្រោះ​មហន្តរាយធម្មជាតិ ក្នុងកំណត់ត្រាប្រវត្តិសាស្ត្រ​មនុស្សជាតិនេះ បានផ្ដាច់យកជីវិត​មនុស្ស ៥,៣៩៥នាក់​ក្នុងនោះ ២,០០០នាក់ ជាភ្ញៀវទេសចរណ៍បរទេសនៅក្នុងប្រទេសថៃ។

ថ្លែងនៅប្រាប់ Reuters​ លោក Anand Boonkerkaew ជាមន្ត្រីប៉ូលិសថៃ​នៅក្នុងស្រុក Takua Pa នៃខេត្ត Phang Nga បានគូសបញ្ជាក់ថា «ចាប់តាំងពីមានគ្រោះមហន្តរាយ​រលកយក្ស​ស៊ូណាមិ កាលពីឆ្នាំ២០០៤ អាជ្ញាធរថៃបាន ទាក់ទងក្រុមគ្រួសារសាច់ញាតិ​ជនរងគ្រោះ មកទទួលសាកសព​មនុស្សចន្លោះពី ​៤,០០០នាក់ ដល់ ៥,០០០នាក់ ប៉ុន្តែសាកសព​មនុស្សប្រមាណជា ​៤០០នាក់ផ្សេងទៀត​នៅតែមិនទាន់អាចកំណត់​អត្តសញ្ញាណបាននៅឡើយទេរហូតមកទល់​នឹងពេលនេះ»។

គួររំលឹកថា គ្រោះមហន្តរាយរលកយក្សស៊ូណាមិ​កាលពីឆ្នាំ២០០៤ បានសម្លាប់មនុស្សសរុប ២២៦,០០០នាក់ ដែលភាគច្រើនបំផុតជាជនជាតិឥណ្ឌូណេស៊ី៕