(​សេអ៊ូល)៖ រដ្ឋាភិបាលកូរ៉េខាងត្បូងបានឱ្យដឹងថា ប្រទេសកូរ៉េខាងជើង​កំពុងដំណើរការការអភិវឌ្ឍ​យន្ដហោះគ្មានមនុស្សបើក (Drone)​ ដែលមានសមត្ថភាពខ្ពស់​ក្នុងការស៊ើបការ និងអាចហោះហើរ​ក្នុងរយៈចំងាយឆ្ងាយ។ នេះបើតាមការចេញផ្សាយ​ដោយទីភ្នាក់ងារ​សារព័ត៌មាន យ៉ុនហាប់ ​នៅព្រឹកថ្ងៃចន្ទ ទី១៩ ខែធ្នូ ឆ្នាំ២០១៦។​

កាលពីសប្ដាហ៍មុន​សា្ថនីយ៍ទូរទស្សន៍មជ្ឈិមកូរ៉េខាងជើង KCTV​ បានរាយការណ៍ថា​ យន្ដហោះ Drone​ ប្រភេទថ្មីនេះ​កំពុងស្ថិតនៅក្នុងដំណាក់កាលអភិវឌ្ឍន៍ ក៏ប៉ុន្តែព្រមពេលជាមួយគ្នា KCTV មិនបានបង្ហាញ​ពីរូបភាពពិតប្រាកដនៃយន្ដហោះ Drone ​នេះដែរ ដោយគ្រាន់តែអះអាងថា​​វាអាចហោះបានឆ្ងាយ និងមានសមត្ថភាពខ្ពស់​ក្នុងការស៊ើបការណ៍ ឬអង្កេតតាមដាន​ព្រមទាំង​អាចចាប់សញ្ញាណភ្លើងឆេះព្រៃ ក៏ដូចជាអង្កេតលើតំបន់នេសាទជាដើម។

គួរបញ្ជាក់ថា បើតាមរដ្ឋាភិបាលកូរ៉េខាងត្បូង​ កូរ៉េខាងជើង​មានយន្ដហោះស៊ើបការណ៍ប្រមាណជា ៣០០គ្រឿង និងយន្ដហោះ Drone ​១០គ្រឿងដែលអាចបំពាក់អាវុធបាន ហើយមិនតែប៉ុណ្ណោះ ក្នុងពេលបច្ចុប្បន្ន​ទីក្រុងព្យុងយ៉ាង ក៏កំពុងតែអភិវឌ្ឍយន្ដហោះ Drone​ របស់ខ្លួនផងដែរ សម្រាប់បម្រើការ​ក្នុងវិស័យយោធា​ជាជាងក្នុងវិស័យឯកជន៕