(អាមេរិក)៖ ចាំបាននូវសារព្រមានរបស់លោក សាដដាំ ហ៊ូស្សេន អតីតមេដឹកនាំកំពូលនៃប្រទេសអ៊ីរ៉ាក់ ដែលត្រូវបានកងទ័ពអាមេរិក និងសម្ព័ន្ធមិត្តធ្វើការវាយប្រហារផ្តួលរំលំរបបដឹកនាំរបស់លោក និងបានកាត់​ទោសរូបលោកដោយព្យួរកចំពោះមុខអន្តរជាតិ កាលពីឆ្នាំ២០០៣ នោះធ្លាប់បានព្រមានថា សហរដ្ឋអាមេរិក​ គ្មានលទ្ធភាពក្នុងការគ្រប់គ្រងប្រភេទអ៊ីរ៉ាក់នោះឡើយ ព្រោះអាមេរិកមិនយល់ទឹកចិត្តនៃជនជាតិ​អារ៉ាប់​។ នេះបើតាមការដកស្រង់ពីសារព័ត៌មាន Sky News នាព្រឹកថ្ងៃចន្ទ ទី១៩ ខែធ្នូ ឆ្នាំ២០១៦។

តាមពិតទៅលោក សាដដាំ ធ្លាប់បានដឹកនាំប្រទេសអ៊ីរ៉ាក់ ប្រកបដោយភាពរីកចំរើនខាងផ្នែកសេដ្ឋកិច្ចអស់​រយៈកាលជាង ២០ឆ្នាំ ហើយនៅមុនការដួលរលំនោះលោក សាដាំ ធ្លាប់បានលើកឡើងឆ្លើយតបទៅនឹង​ចេតនារបស់លោកខាងលិច ក្នុងការសង្គ្រប់គ្រប់គ្រងប្រទេសអ៊ីរ៉ាក់ យ៉ាងដូច្នេះថា «អ្នកឯងកំពុងតែ​ដើរទៅរកសេចក្តីវិនាសហើយ។ អ្នកនឹងដឹងថា វាមិនមែនជារឿងងាយនោះឡើយ នៅក្នុងការដឹកនាំ​ប្រទេសអ៊ីរ៉ាក់។ អ្នកនឹងបរាជ័យ ព្រោះអ្នកមិនស្គាល់ភាសាអារ៉ាប់, ប្រវត្តិសាស្ត្រ, និង ការមិនយល់ដឹងអំពី​ទឹកចិត្តនៃប្រជាជនអារ៉ាប់»។

ជុំវិញបញ្ហានេះលោក Nixon អ្នកវិភាគជាន់ខ្ពស់ ដែលធ្វើការរួមគ្នាជាមួយនិងស្ថាប័ន CIA របស់សហរដ្ឋ​អាមេរិកក៏បានសរសេរសៀវភៅមួយដែរ ស្តីអំពីរឿងរ៉ាវទាក់ទងនឹងលោក សាដដាំ ហ៊ូស្សេន និងសង្គ្រាម​របស់អាមេរិកជាមួយនឹងប្រទេសអ៊ីរ៉ាក់កាលពីឆ្នាំ២០០៣។ លោក Nixon ក៏បានដកស្រង់មតិរបស់​ប្រជាជន​អាមេរិកមួយចំនួនផងដែរ ដែលពួកគេបានបង្ហាញពីចំណាប់អារម្មណ៍ផ្ទាល់ខ្លួនថា សង្គ្រាមប្រមាញ់ សាដដាំ ដែលចាប់ផ្តើមឡើងកាលពីខែមីនា ឆ្នាំ២០០៣ នោះជារឿងខុស។

សៀវភៅរបស់ Nixon ក៏បានបញ្ជាក់ទៀត លោក សាដដាំ បានគ្រប់គ្រងអ៊ីរ៉ាក់ប្រកបដោយឥទ្ធិពល​ នៅក្នុងការ​គ្រប់គ្រងក្រុមជ្រុលនិយមអ៊ីស្លាម នៅក្នុងប្រទេស ដែលក្រោយពីការដួលរលំនោះពួកគេបានវិវឌ្ឍន៍ខ្លួនបន្តិច​ម្តងៗរហូតដល់ក្លាយជាក្រុម ISIS។ បន្ថែមពីនេះទៀត លោក សាដដាំ ក៏នឹងតែរក្សាជំហរយ៉ាងមាំទាំក្នុងការ​ប្រឆាំងនឹងប្រទេសអ៊ីរ៉ង់ ដែលជាសត្រូវមិនអាចក្លាយជាមិត្តរបស់ខ្លួននោះផងដែរ។

ទោះបីជាបែបនេះក្តីអ្នកវិភាគខាងលើបានសរុបសេចក្តីថា របៀបនៃការដឹកនាំរបស់លោក សាដដាំ តាមបែប​ព្រៃផ្សៃ និងការឈ្លានពានប្រទេសជិតខាងនោះ គឺជាកត្តាចម្បងដែលធ្វើឲ្យរបបដឹកនាំរបស់លោកដួលរលំ៕