(វ៉ាស៊ីនតោន)៖ ប្រទេសចិនបានធ្វើការឃាត់ទុកដោយខុសច្បាប់នូវ កូននាវាមុជទឹកដែលគ្មានមនុស្សបើកបរមួយគ្រឿងរបស់សហរដ្ឋអាមេរិក នៅក្នុងដែនទឹកអន្តរជាតិនៃតំបន់សមុទ្រចិនខាងត្បូង ដែលទង្វើនេះអាចនឹងដុតរោលភាពតឹងតែង ជុំវិញវត្តមានមូលដ្ឋានយោធារបស់ចិននៅដែនសមុទ្រដែលមានជម្លោះនេះបន្ថែមទៀត។ នេះបើតាមការចេញផ្សាយ ដោយសារព័ត៌មាន Channel News Asia នៅមុននេះបន្តិចនាព្រឹកថ្ងៃសៅរ៍ ទី១៧ ខែធ្នូ ឆ្នាំ២០១៦។
លោកអនុសេនីយ៍ឯក ជែហ្វ ដេវីស (Jeff Davis) អ្នកនាំពាក្យក្រសួងការពារជាតិអាមេរិកបានឲ្យដឹងថា នាវាមុជទឹកខាងលើត្រូវបានគេចាប់ឃាត់ទុកនៅចម្ងាយប្រហែលជា ៩០គីឡូម៉ែត្រពីឈូងសមុទ្រស៊ូប៊ិក (Subic Bay) នៃប្រទេសហ្វីលីពីននៅព្រឹកថ្ងៃសុក្រម្សិលមិញនេះ ក្នុងហេតុការណ៍អហិង្សាមួយ ខណៈពេលដែលនាវាស៊ីវិលរបស់អាមេរិកឈ្មោះថា USNS Bowditch កំពុងរង់ចាំទទួលកូននាវាមុជទឹកមួយគូរបស់ខ្លួន ដែលបានត្រឡប់មកពីធ្វើការប្រមូលយកទិន្នន័យ អំពីទឹកសមុទ្រជាធម្មតា។
នៅពេលនោះនាវាមុជទឹករបស់ចិនបានឈប់នៅរយៈចម្ងាយ ៥០០ម៉ែត្រពីនាវា Bowditch និងបានឆក់យកកូននាវាមុជទឹកមួយយកទៅបាត់ ខណៈមួយទៀតត្រូវបានយកមកកាន់នាវាអាមេរិកវិញដោយសុវត្ថិភាព ហើយភ្លាមៗក្រុមការងារនៅលើនាវា Bowditch ក៏បានធ្វើការទាក់ទ តាមវិទ្យុទៅកាន់នាវាមុជទឹកចិនដើម្បីស្នើសុំឲ្យទុកកូននាវារបស់ខ្លួននៅទីនោះវិញផងដែរ ប៉ុន្តែគ្មានការឆ្លើយតបឡើយហើយនាវាចិនក៏បានធ្វើដំណើរចាកចេញទៅបាត់។
គួរបញ្ជាក់ថា នាពេលនេះរដ្ឋាភិបាលទីក្រុងវ៉ាស៊ីនតោន ក៏បានចេញសំណើជាផ្លូវការមួយតាមរយៈការទូត ដើម្បីសុំឲ្យទីក្រុងប៉េកាំងប្រគល់កូននាវាមុជទឹកនោះមកវិញផងដែរ៕
