(ព្យុងយ៉ាង)៖ មុខតំណែងជាប៉ូលិសចរាចរណ៍នៅក្នុងប្រទេសកូរ៉េខាងជើង​ ​ត្រូវបានរក្សាទុកសម្រាប់តែ​នារីៗ​មាន​សម្រស់​ស្រស់​ស្អាត​ដាច់គេ​​ប៉ុណ្ណោះ​ ដែលអាចចូល​បំពេញតួនាទីក្នុងការងារ​ដ៏មានកិត្តិយសនេះ​បាន។ បេក្ខភាពនឹងមានសិទ្ធិអាទិភាពជាងបើសិនជានារីវ័យក្មេង ​ហើយ​មាន​កម្ពស់​ខ្ពស់​​ដូច​​តារាម៉ូដែល និងមាន​សម្រស់​ស្អាតផូរផង់។​ នេះបើតាមការចេញផ្សាយ​ដោយសារព័ត៌មាន Daily Mail​ នៅ​ព្រឹក​ថ្ងៃសៅរ៍ ទី១៧ ខែធ្នូ ឆ្នាំ២០១៦។​

មន្រ្តីប៉ូលិសចរាចរណ៍ជាស្ត្រីនៃរដ្ឋធានីព្យុងយ៉ាង គឺជាទិដ្ឋភាពទូទៅមួយ នៅឯចំណុច​ប្រសព្វនៃដងវិថី​នានា​ជុំវិញទីក្រុងមួយនេះ ដោយ​សារនៅ​​រយៈ​​ពេលប៉ុន្មានឆ្នាំចុងក្រោយនេះ​ គេសង្កេតឃើញថា​ចរាចរណ៍​មានការកើនឡើង​ខ្លាំងគួរសម​ ហើយនារីបញ្ជាចរាចរណ៍​ទាំង​នោះ​​ប្រហែល​​ជា​​និមិត្ត​​រូប​​ដ៏គួរឲ្យទាក់ទាញ​បំផុត​នៃទីក្រុងព្យុងយ៉ាង​ទោះ​បីជា​ពួក​គេ​ក៏​មាន​វត្ត​មាន​​នៅ​តាម​បណ្តា​ទី​ក្រុង​ដទៃៗ​​ផ្សេង​ទៀត​ ​ទូ​ទាំង​ប្រទេស​​​កូរ៉េខាង​ជើង​​យ៉ាង​ណា​ក្តី​។​

ក្រៅពីបញ្ជាចរាចរណ៍នៅក្រុងទីក្រុងព្យុងយ៉ាង នារីប៉ូលិសចរារណ៍​ក៏ជាទម្លាប់តែងតែ​បានធ្វើការគោរព​យ៉ាងម៉ឹងម៉ាត់​ចំពោះមន្រ្តី​យោ​ធា​ក៏ដូចជា​រដ្ឋាភិបាលដែលបានធ្វើដំណើរឆ្លងកាត់ពួកគេ ហើយលើសពីនេះ​ដោយសារ​តែសម្រស់​ដ៏លេចធ្លោរ នារីៗ​ទាំងនោះ​បាន​បង្កើត​ចេញ​​ជា​​ក្រុម​អ្នកគាំទ្រ (Fansដោយមិនដឹងខ្លួន និងថែមទាំងមានជា​ គេហទំព័រដែលមានការជ្រើសរើស «នារីចរាចរណ៍​ទីក្រុងព្យុង​យ៉ាង​​ប្រចាំ​ខែ» ទៀតផង។​

នៅក្នុងគេហទំព័រខាងលើ ក៏មានជាល្បែងលេង និងវេទិកាជជែកមួយ​ផងដែរ ដែលជាកន្លែងសម្រាប់​​ឲ្យបណ្តា​អ្នកគាំទ្រ​ដ៏ងប់ងល់បំផុតនោះ ចែក​​រំលែកសារក៏ដូចជាកំណាព្យ​បង្ហាញពីអារម្មណ៍​របស់ពួកគេផ្ទាល់ចំពោះ​នារីចរាចរណ៍ ហើយមិនត្រឹមតែនៅលើបណ្តាញអ៊ីនធឺណែត​ប៉ុណ្ណោះទេ​​ដែលនារីទាំងអស់នោះ​ទទួលបាន​ចំណាប់អារម្មណ៍​ខ្លាំងក្លាបែបនេះ ដោយនៅក្នុងប្រទេសកូរ៉េខាងជើងទាំងមូល នារី​ចរា​ចរណ៍​ដ៏​ស្រស់ស្អាត​​ទាំងនេះបានធ្វើឲ្យមនុស្សជាច្រើនជាពិសេសប្រុសៗ នៅក្នុងប្រទេសកុម្មុយនិស្តមួយនេះ​ឈ្លក់វង្វេង​ស្ទើរ​តែ​ដល់​ថ្នាក់​​ហួស​ហេតុ​ថែមទៀត​។​​

ជុំវិញការងប់ងល់ចំពោះ​នារីចរាចរណ៍នៅកូរ៉េខាងជើង​នេះដែរ​ រូបភាពរបស់ពួកគេ​ត្រូវបានប្រើប្រាស់យ៉ាង​ទូលំទូលាយ​នៅលើតែមបិទសំបុត្រ, ខិតប័ណ្ណ,​ និងផ្ទាំងបដាធំៗ​ ហើយកូនក្រមុំតុក្កតា​ជានារីចរាចរណ៍​ក៏ត្រូវបានផលិត​ឡើង​សម្រាប់ធ្វើជាសម្ភារៈក្មេងលេងផងដែរ។​

គួរបញ្ជាក់ថាកាលពីឆ្នាំ២០១៣ នារីប៉ូលិសចរាចរណ៍វ័យ ២២ឆ្នាំម្នាក់មានឈ្មោះ រី យ៉ុង ស៊ីម​ (Ri Kyong Sim)​ បានទទួលមេដាយកិត្តិយស​ ​«Hero of the Republic»​ ដ៏ខ្ពង់ខ្ពស់​សម្រាប់ការខិតខំ​ប្រឹងប្រែង​​របស់​នាង​ដែលបានជួយឲ្យការធ្វើចរាចរណ៍​​ នៅក្នុងទីក្រុងប្រកបដោយ​សុវត្ថិ​ភាព​ ប៉ុន្តែមាន​​ពាក្យចរចាមអារ៉ាម​ថា​តាមពិតទៅ​រូបនាងប្រហែលជាបានជួយជីវិតរបស់ប្រមុខដឹកនាំកំពូល នៃប្រទេសកូរ៉េខាងជើង គឺលោក គីម ជុងអ៊ុន​ នៅក្នុងអំឡុងនៃការប៉ុនប៉ងលួចធ្វើឃាត​មិនបានសម្រេចមួយ ហើយសព្វថ្ងៃនេះអ្នកនាង រី មានទំព័រអ្នកគាំទ្រផ្ទាល់​ខ្លួនមួយ​​ផង​ដែរ​នៅ​លើ​វែប​សាយ​​ «Pyongyang Traffic Girls»៕​