(ព្រុចសែល)៖ បញ្ហាប្រឈម «Brexit» របស់នាយករដ្ឋមន្រ្តីប្រទេសអង់គ្លេស លោកស្រី ធឺរីសា មេយ៍ (Theresa May) ត្រូវបានគេមើលឃើញ​យ៉ាងច្បាស់​នៅថ្ងៃព្រហស្បតិ៍​ម្សិលមិញនេះ ខណៈពេល​ដែល​មេដឹកនាំ​បណ្តាប្រទេសដទៃៗ​ទៀតនៃ​សហភាពអឺរ៉ុប បាន​ធ្វើ​ឬកពារ​​ព្រ​ងើយ​កន្តើយ​​​ដាក់​រូប​លោកស្រី នៅក្នុងកិច្ចប្រជុំ EU (European Union) ដ៏សំខាន់មួយដែលបានប្រារព្ធ​ឡើងក្នុងទីក្រុងព្រុចសែល​នៃប្រទេសប៊ែល​ហ្សិក​។ នេះបើតាមការចេញ​ផ្សាយដោយសារព័ត៌មាន Daily Mail នៅមុននេះបន្តិចនា​រសៀលថ្ងៃសុក្រ ទី១៦ ខែធ្នូ ឆ្នាំ២០១៦។

ស្របពេលដែលថ្នាក់ដឹកនាំ​ប្រទេសទាំង ២៧ផ្សេងទៀតបានទទួលស្វាគមន៍​គ្នាទៅវិញទៅមក​យ៉ាងកក់ក្តៅ តាមរយៈការឱបក៏ដូចជាការថើប ​នៅមុនកិច្ចប្រជុំចាប់ផ្តើមនោះ ខណៈលោកស្រី​នាយក​រដ្ឋមន្រ្តីអង់គ្លេស​ត្រូវបានគេធ្វើជាមិនរវីរវល់ជាមួយ ដោយទុកលោកស្រី​ចោល​ឲ្យនៅ​ឈរ​​​តែ​ម្នាក់​ឯង​​គ្មាននរណាម្នាក់​និយាយរក​ឡើយ ហើយក្រោយពីឈរច្រិញច្រុញ និងងាកទៅងាក​មកអស់រយៈពេលជាង ១០វិនាទីមក លោកស្រី មេ ក៏បានសម្រេចចិត្តចូលតុអង្គុយ​តែម្តងទៅ។

គួរបញ្ជាក់ថា ចំពោះមនុស្សជាច្រើនទង្វើនេះ គឺជាសញ្ញាតំណាងឲ្យអាកប្បកិរិយា​របស់សហភាពអឺរ៉ុប​ទាំងមូល​ចំពោះចក្រភពអង់គ្លេស ដែល​​បានប្រកាសអំពីការសម្រេចចិត្ត​ដកខ្លួនចេញពីសហភាពអឺរ៉ុប​កាលពីខែមិថុនា ហើយជាងនេះទៅទៀត​ បណ្តាមេដឹកនាំ EU ក៏​​មិន​បាន​​អញ្ជើញ​លោកស្រី មេ ឲ្យទៅចូលរួមក្នុងពិធីស្រស់​ស្រូប​អាហារ​​ពេលល្ងាចជាមួយពួកគេ​ផងដែរ ដើម្បីអនុញ្ញាត​ឲ្យថ្នាក់ដឹកនាំ​សហភាព​អឺរ៉ុបទាំង ២៧រូប​អាចពិភាក្សាអំពីគំរោង Brexit ដោយសម្ងាត់បាន។ បន្ថែមពីនេះនៅក្នុងកិច្ចប្រជុំខាងលើ ក៏មិនមានការពិភាក្សាអំពីបញ្ហា Brexit ផងដែរ ​ដោយបែរទៅផ្តោតសំខាន់​លើបញ្ហាវិបត្តិនៃការធ្វើអន្តោប្រវេសន៍វិញ៕