(មូស្គូ)៖ ប្រធានាធិបតីរុស្ស៊ី​លោក វ៉្លាឌូមៀ ពូទីន បានធ្វើដំណើរចាកចេញ​ទៅកាន់ប្រទេសជប៉ុន​ហើយ​ដើម្បីបំពេញទស្សនកិច្ច​ចំនួនពីរថ្ងៃ និង​ជួបពិភាក្សាគ្នាជាមួយ នាយករដ្ឋមន្រ្តី​ជប៉ុនលោក ស៊ីនហ្សូ អាបេ ដោយសង្ឃឹមថា​ នឹងអាចឈានដល់កិច្ចព្រមព្រៀងស្តីពីការដោះស្រាយ​បញ្ហាជម្លោះដែនដី ដែលបានរារាំង​ប្រទេស​ទាំងពីរ​មិនឲ្យមានឱកាសចុះហត្ថលេខាលើ «សន្ធិសញ្ញាសន្តិភាព» សំដៅបញ្ចប់សង្រ្គាមលោក​លើកទី២បាន។ នេះបើតាម​ការចេញផ្សាយដោយសារព័ត៌មាន Channel News Asia នៅមុននេះ​បន្តិច​នាព្រឹកថ្ងៃពុធ ទី១៤ ខែធ្នូ​ ឆ្នាំ២០១៦។

លោក អាបេ នឹងរៀបចំពិធីទទួលស្វាគមន៍លោក ពូទីន នៅឯទីក្រុងបុរាណណាហ្គាតូ (Nagato) ក្នុងក្តី​សង្ឃឹម​ថានឹងអាចសម្រេចបានកិច្ច​ព្រម​ព្រៀង​ពាក់ព័ន្ធនឹងប្រជុំ​កោះគូរីល ដែលត្រូវបានកាន់កាប់​ដោយ​​កងទ័ពរបស់​សហភាពសូវៀត (បច្ចុប្បន្នគឺប្រទេសរុស្ស៊ី) កាលពីឆ្នាំ១៩៤៥ ហើយនិង​ត្រូវបានទាមទារមកវិញ​ដោយរដ្ឋាភិបាល ទីក្រុងតូក្យូ​ ចាប់តាំងពីពេលនោះមកផងដែរ។

ថ្លែងក្នុងកិច្ចសម្ភាសន៍​ជាមួយស្ថានីយទូរទស្សន៍ និងសារព័ត៌មានជប៉ុន​លោកប្រធានាធិបតីរុស្ស៊ី​បាននិយាយថា «អវត្តមាននៃសន្ធិសញ្ញាសន្តិ​ភាព​រវាងរុស្ស៊ី និងជប៉ុនគឺ​កំហុសមួយដែលបានបន្សល់ទុក​តាំងពីអតីតកាល ហើយវាគួរតែលុបបំបាត់ចោល ប៉ុន្តែថាតើយើងនឹងធ្វើដូច្នោះ​ដោយរបៀបណានោះ គឺសំណួរដ៏លំបាកមួយ»

គួរបញ្ជាក់ថា​ប្រធានាធិបតីរុស្ស៊ីលោក វ្ល៉ាឌីមៀ ពូទីន និងនាយករដ្ឋមន្រ្តីជប៉ុនលោក ស៊ីនហ្សូ អាបេ នឹងមានកិច្ចជួបពិភាក្សាគ្នា​​ចាប់ពីថ្ងៃទី​១៥ ដល់ថ្ងៃទី១៦ ខែធ្នូនេះ៕