(វ៉ាស៊ីនតោន)៖ ប្រធានាធិបតីអាមេរិកជាប់ឆ្នោតលោក ដូណាល់ ត្រាំ បានសម្រេចជ្រើសរើសអគ្គនាយក​ក្រុមហ៊ុន​ Goldman Sachs ដែលជាក្រុមហ៊ុនវិនិយោគ​ដ៏ធំមួយនៅសហរដ្ឋ​អាមេរិកធ្វើ​ជាប្រធាន​ក្រុមប្រឹក្សាសេដ្ឋកិច្ចជាតិ​ប្រចាំនៅសេតវិមាន។ នេះបើតាមប្រព័ន្ធផ្សព្វផ្សាយ​ដោយអាមេរិក ដែលចេញផ្សាយ​ដោយបន្តដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាព្រឹកថ្ងៃសៅរ៍ ទី១០ ខែធ្នូ ឆ្នាំ២០១៦។

បើយោងតាមប្រភពព័ត៌មានដដែល លោក Gary Cohn ដែលមានតួនាទីជានាយកប្រតិបត្តិ​របស់ក្រុមហ៊ុន Goldman ផងដែរ​នោះត្រូវបានផ្តល់សំណើ​នៃមុខតំណែងជាប្រធានក្រុមប្រឹក្សា​សេដ្ឋកិច្ចដ៏​សំខាន់ ដែលទទួលបន្ទុក​ធ្វើការសម្របសម្រួល​បញ្ហាសេដ្ឋកិច្ច​ជាតិ និងអន្តរជាតិនៅក្នុង​រដ្ឋាភិបាលរបស់លោក ដូណាល់ ត្រាំ ហើយប្រសិនបើលោក Cohn ទទួលយកតំណែងនេះ​ដែល​មិន​ចាំ​បាច់ឲ្យមានការឯកភាព​ពីព្រឹទ្ធសភានោះ លោកនឹងក្លាយជាបុគ្គលទីបីហើយដែលមកពីក្រុមហ៊ុន Goldman និងបានកាន់តំណែង​នៅក្នុងជួររដ្ឋា​ភិបាលរបស់លោក ត្រាំ ព្រោះថាបេក្ខជន​រដ្ឋមន្រ្តីរតនា គារជាតិលោក Steven Mnuchin និងទីប្រឹក្សាប្រចាំសេតវិមានលោក Steve Bannon ក៏ជាអ្នកធ្វើការនៅក្រុមហ៊ុន Goldman Sachs ផងដែរ។

គួរបញ្ជាក់ថាក្រុមប្រឹក្សាសេដ្ឋកិច្ចជាតិ ត្រូវបានបង្កើតឡើងដោយអតីតប្រធានាធិបតីអាមេរិកលោក ប៊ីល គ្លីនតុន កាលពីឆ្នាំ១៩៩៣ ហើយវាបានក្លាយជាអង្គភាព​ដែលសំខាន់បំផុត​ក្នុងការបង្កើត គោលនយោបាយ​សេដ្ឋកិច្ចនៅឯសេតវិមាន។ ដោយឡែកនៅសល់តែ ​៤១ថ្ងៃទៀតប៉ុណ្ណោះលោក ដូណាល់ ត្រាំ នឹងធ្វើការស្បថចូលកាន់តំណែងជា​ប្រធានាធិបតីទី ៤៥ របស់សហរដ្ឋអាមេរិក ជាផ្លូវការហើយ៕