(អ៉ីស្លាម៉ាបាដ)៖ ប្រទេសប៉ាគីស្ថានបានផ្ដើម​ប្រារព្ធពិធីកាន់ទុក្ខ​នៅថ្ងៃព្រហស្បតិ៍នេះ ដល់ជនរងគ្រោះទាំង ៤៧នាក់ដែលបានស្លាប់​បាត់បង់ជីវិត ​នៅក្នុងគ្រោះថ្នាក់ធ្លាក់យន្ដហោះ​នៃជើងហោះហើរ PK 661 របស់​ក្រុមហ៊ុនអាកាសចរណ៍ Pakistani International Airlines កាលពីថ្ងៃពុធម្សិលមិញ នៅឯភាគខាងជើង​នៃប្រទេសហើយនេះគឺសោកនាដកម្មធ្លាក់យន្ដហោះ ដែលបង្កឲ្យមនុស្សស្លាប់ច្រើនជាងគេ នៅរយៈពេលបួន​ឆ្នាំចុងក្រោយនេះ។ នេះបើតាមការចេញផ្សាយ​ដោយសារព័ត៌មាន Channel News Asia នៅរសៀលថ្ងៃព្រហស្បតិ៍ ទី០៨ ខែធ្នូ ឆ្នាំ២០១៦។

យោងតាមប្រភពក្រៅផ្លូវការ បញ្ហាគ្រឿងម៉ាស៊ីនអាចជាមូលហេតុចម្បងធ្វើឱ្យយន្ដហោះនេះធ្លាក់ ក៏ប៉ុន្តែព្រមពេលជាមួយគ្នានេះ​ប្រធានក្រុមហ៊ុនអាកាសចរណ៍ Pakistani International Airlines លោក មូហាំម៉ាត់ អាហ្សំា សៃហ្គូល (Muhammad Azam Saigol) បានបដិសេធចំពោះការលើកឡើងនេះ ដោយលោកបញ្ជាក់ដូច្នេះថា «​ខ្ញុំជឿជាក់ថាបញ្ហាបចេ្ចកទេស ឬក៏កំហុសប្រព្រឹត្តិដោយ​មនុស្ស មិនមែនជាមូលហេតុធ្វើឱ្យយន្ដហោះធ្លាក់ឡើយ»

គួរបញ្ជាក់ថាជើងហោះហើរ PK 661 ដឹកមនុស្ស ៤៧នាក់ក្នុងនោះមានកុមារពីរនាក់ ជនបរទេស០៣នាក់ រួមទាំងបុគ្គលិកយន្ដហោះ០៥នាក់ មានគោលដៅហោះហើរពីទីក្រុង Chitral ឆ្ពោះទៅកាន់​រដ្ឋធានី អ៉ីស្លាម៉ាបាដ ក៏ប៉ុន្តែក្រោយមក​ត្រូវបានគេរាយការណ៍ថា បានធ្លាក់នៅឯតំបន់ភ្នំក្បែរទីក្រុង Havelian នៃខត្ត Khyber-Pakhtunkhwa ស្ថិតនៅ​ភាគខាងជើង​ប្រទេសប៉ាគីស្ថាន។ ចំណែកឯ​ក្រុមអ្នកស៊ើបអង្កេត កំពុងស្វែងរកមូលហេតុ​ដែលបណ្ដាលឱ្យ​យន្ដហោះនេះធ្លាក់៕