(ញូយ៉ក)៖ ​ក្រុមប្រឹក្សាសន្តិសុខអង្គការសហប្រជាជាតិ បានបរាជ័យក្នុងការអនុម័តលើដំណោះស្រាយ​ ដែលស្នើឱ្យមានបទឈប់បាញ់រយៈពេល ០៧ថ្ងៃនៅក្នុងទីក្រុងអាឡេប៉ូ ប្រទេសស៊ីរី ដោយសារតែរុស្ស៊ី និងចិនបានប្រើសិទ្ធិជំទាស់ ​ឬវ៉េតូនឹងសំណើនេះ ដោយអះអាងថាវាផ្ទុយទៅនឹងបទបញ្ញាត្តិរបស់​ក្រុមប្រឹក្សាសន្តិសុខ ខណៈប្រជាជនស៊ីរីនៅតែជាអ្នកទទួលរងថ្មបាក់ ពីការមិនត្រូវរ៉ូវគ្នារវាងមហាអំណាច​ពិភពលោក។ នេះបើតាមការចេញផ្សាយដោយ​ទីភ្នាក់ងារសារព័ត៌មានចិន​ស៊ិនហួរ នៅព្រឹកថ្ងៃអង្គារ ទី០៦ ខែធ្នូ ឆ្នាំ២០១៦។​

នេះគឺជាលើកទី ០៦ហើយដែលទីក្រុងមូស្គូ ប្រើប្រាស់សិទ្ធិវ៉េតូរាំងខ្ទប់ដំណោះស្រាយ​ នៃក្រុមប្រឹក្សា​សន្តិសុខ ​ស្ដីពីបញ្ហាស៊ីរីចាប់តាំងពីសង្រ្គាមផ្ទុះឡើង ​នៅខែមីនា ឆ្នាំ២០១១ ហើយនេះក៏ជាលើកទី០៥ ផងដែរសម្រាប់​ចិន។ ពោលបើនិយាយឱ្យចំ​ការចរចាចេះតែធ្វើឡើង ហើយមហាអំណាចនិយាយគ្នាមិនត្រូវ ប្រជាជនស៊ីរី​ស្លូតត្រង់នៅតែបន្តបាត់បង់ជីវិត​ស្ទើរតែរាល់ថ្ងៃ ជាពិសេសគឺនៅភាគខាងកើតទីក្រុង អាឡេប៉ូ តែម្ដងជាទី​ដែលរដ្ឋាភិបាលស៊ីរី មានរុស្ស៊ីជាមេកើយ អះអាងថាខ្លួនដណ្ដើមបានទឹកដីមួយផ្នែកធំ ពីក្រុមឧទ្ទាមស៊ីរី គាំទ្រដោយសហរដ្ឋអាមេរិក។

ដោយឡែកជុំវិញដំណោះស្រាយនេះដែរ ប្រធានក្រុមប្រឹក្សាសន្តិសុខ លោក Vitali Tchourkine បានគូសបញ្ជាក់ថាប្រទេសចំនួន ១១ បានបោះឆ្នោតគំាទ្ររីឯវ៉េណេស៊ុយអេឡា បោះឆ្នោតជំទាស់ និង អង់ហ្គូឡា បានអនុប្បវាទ។ ទោះបីជាយ៉ាងណាក៏ដោយលោក Tchourkine បានអំពាវនាវឱ្យក្រុមប្រឹក្សា​សន្តិសុខ ទាំងមូលរង់ចាំមើលលទ្ធផលនៃកិច្ចប្រជុំក្នុងទីក្រុងហ្សឺណែវ នៅថ្ងៃអង្គារនេះ រវាងលោក រដ្ឋមន្ត្រីការបរទេសអាមេរិក លោក ចន ឃើរី និងសមាភាគីរុស្ស៊ីលោក ស៊ែហ្គៃ ឡារ៉ូវ។

គួររំលឹកថាបើតាមអង្គការឃ្លាំមើលសិទ្ធិមនុស្សស៊ីរី ជនស៊ីវិលយ៉ាងហោចណាស់ ៣២៤នាក់ក្នុងនោះមាន​កុមារ ៤៤នាក់បានស្លាប់​នៅភាគខាងកើតទីក្រុងអាឡេប៉ូ ស្របពេលដែល​ប្រជាជនស៊ីរី ៥០,០០០នាក់ ក្នុងចំណាមប្រជាជនសរុប ២៥០,០០០នាក់ បានរត់គេចចេញពីទីក្រុងមួយនេះ​ចាប់តំាងពីការផ្ដើម​ប្រតិបត្តិការ វាយលុកដោយរដ្ឋាភិបាលស៊ីរីមកម្ល៉េះ៕