(តិចសាស់)៖ យន្តហោះដឹកអ្នកដំណើរមួយគ្រឿង របស់សហរដ្ឋអាមេរិក United Airlines បានធ្វើការ​ចុះចតយ៉ាងបន្ទាន់នៅអាកាសយានដ្ឋាននៃទីក្រុង San Antonio រដ្ឋតិចសាស់ ភាគខាងត្បូង​អាមេរិក​ដោយសារតែជួបបញ្ហាដាច់ហ្វ្រាំងនៅកង់ផ្នែកខាងមុខ ប៉ុន្តែសំណាងល្អដែលវាមិនបានបង្ករបួស ឬក៏គ្រោះថ្នាក់ដល់នរណាម្នាក់ឡើយ។ នេះបើតាមការចេញផ្សាយ​ដោយទីភ្នាក់ងារព័ត៌មានចិនស៊ិនហួរ នៅមុននេះបន្តិច នារសៀលថ្ងៃចន្ទ ទី០៥ ខែធ្នូ ឆ្នាំ២០១៦។

យន្តហោះខាងលើនេះមានជើងហោះហើរ United Flight 494 ដឹកអ្នកដំណើរសរុប ៥៥នាក់ ត្រូវបានបង្ខំ​ចិត្តចុះចតខណៈដែលមានបញ្ហាប្រព័ន្ធហ្វ្រាំងកង់មុខ ប៉ុន្តែខាងផ្នែកគ្រប់គ្រង​អាកាសយាន​ដ្ឋាន​ខាងលើនេះ​បានអះអាងថា វាត្រូវបានបញ្ជាឲ្យចុះចតដោយសុវត្ថិភាព។ ដោយឡែកផ្លូវចុះចតរបស់យន្តហោះ​ត្រូវបានបិទជាបណ្តោះអាសន្ន ដើម្បីរង់ចាំការពិនិត្យឡើង​វិញដោយក្រុមជំនាញ៕