(កាប៊ុល)៖ ពួកឧទ្ទាមតាលីបង់បានបាត់បង់អ្នកជំនាញកំពូលៗរបស់ខ្លួន ដែលមានឯកទេសយ៉ាងស្ទាត់​ជំនាញ​ខាងផលិតគ្រាប់បែក ក្រោយពេលដែលកងកម្លាំងយោធាអាហ្វហ្គានីស្ថាន​ បានចូលលុកលុយ​មូលដ្ឋានលាក់ខ្លួនរបស់ក្រុមសកម្មប្រយុទ្ធ​មួយនេះនៅខេត្ត Helmand ភាគខាងត្បូងប្រទេស។ នេះបើតាម​សេចក្តីរាយការណ៍ពីក្រសួងការពារជាតិអាហ្វហ្គានីស្ថាន ដែលដកស្រង់ដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិច នារសៀលថ្ងៃសុក្រ ទី០២ ខែធ្នូ ឆ្នាំ២០១៦។

បើយោងតាមសេចក្តីថ្លែងការណ៍របស់ក្រសួងខាងលើ អ្នកជំនាញផ្នែកខាងបង្កើតគ្រឿងផ្ទុះ (IED) និងគ្រាប់មីនរបស់ក្រុមសកម្មប្រយុទ្ធតាលីបង់ចំនួន ០៥នាក់ ដោយរួមមានទាំងមេបញ្ជាការរបស់ពួកគេ​មួយរូបឈ្មោះ Aktar Mohammad ផងដែរនោះបានស្លាប់បាត់បង់ជីវិត នៅក្រោយប្រតិបត្តិការយោធា ​ដែលបានធ្វើឡើងនៅជុំវិញស្រុក Nad Ali ខេត្ត Helmand ហើយគ្រាប់បែកកែច្នៃ IED សរុប ៥០គ្រាប់ និងសារធាតុសម្រាប់ផលិតគ្រាប់បែក​ចំនួនប្រាំបាវទៀត ក៏ត្រូវបានរកឃើញ និងដកហូតយកមករក្សាទុក​ដោយកងទ័ពអាហ្វហ្គានីស្ថានផងដែរ។

គួរបញ្ជាក់ថាក្រុមសកម្មប្រយុទ្ធតាលីបង់ និងពួកឧទ្ទាមដទៃទៀតបាននិងកំពុងប្រើប្រាស់គ្រាប់បែកកែច្នៃ IED ដើម្បីធ្វើការវាយប្រហារទៅលើកងកម្លាំងការពារសន្តិសុខ របស់ប្រទេសអាហ្វហ្គានីស្ថាន ប៉ុន្តែមិនត្រឹមតែប៉ុណ្ណោះអាវុធដ៏មានគ្រោះថ្នាក់នេះ បានបណ្តាលឲ្យប្រជាជនស៊ីវិលស្លូតត្រង់ទទួលរង​របួស និងបាត់ជីវិតថែមទៀតផង៕