(ក្រុងរីយ៉ូ)៖ នៅថ្ងៃពុធ និងថ្ងៃព្រហស្បតិ៍នេះ ប្រជាជនប្រេស៊ីលរាប់ម៉ឺននាក់មកពីគ្រប់ទិសទី បានចូលរួមគោរព វិញ្ញាណក្ខន្ធ ចំពោះសមាជិកក្លឹបអាជីព Chapecoense របស់ប្រេស៊ីលដែលជួបគ្រោះធ្លាក់យន្តហោះនៅប្រទេសកូឡុំប៊ី កាលពីថ្ងៃអង្គារ ទី២៩ ខែវិច្ឆិកា ឆ្នាំ២០១៦។

តាមរយៈសារព័ត៌មាន Reuters បានចេញផ្សាយឲ្យដឹងនៅព្រឹកថ្ងៃព្រហស្បតិ៍ ទី១ ខែធ្នូ ឆ្នាំ២០១៦ នេះថា ការប្រារព្ធ ពិធីកាន់ទុក្ខនេះ គឺត្រូវបានធ្វើឡើងនៅក្នុងពហុកីឡដ្ឋានរបស់ក្លឹប Chapecoense ដែលមានមូលដ្ឋាននៅភាគខាងត្បូង នៃប្រទេសប្រេស៊ីលតែម្តង ដោយមានអ្នកចូលរួមប្រមាណ ៩០០០នាក់ កើនដល់ ១៣០០០នាក់គិតត្រឹមថ្ងៃនេះ ហើយ ពួកគេក៏បានបរិច្ចាគប្រាក់ផ្ទាល់ខ្លួនចាប់ពី ៥ដុល្លារ ដល់ ៥៥ដុល្លារដល់ក្លឹបវ័យចំណាស់ ដែលមានអាយុកាល ៤៣ឆ្នាំ នេះផងដែរ។

នាយកប្រតិបត្តិក្លឹប Chapecoense លោក Ivan Tozzo បានថ្លែងក្នុងពិធីកាន់ទុក្ខនោះថា «នេះគឺជាគ្រោះមហន្តរាយ ដែលនឹកស្មានមិនដល់ ហើយការជួយឧបត្ថម្ភរបស់អ្នកគាំទ្រ គឺជាការបង្ហាញ ដើម្បីទ្រទ្រង់ក្លឹបនេះឡើងវិញ។ យើងពិតជាត្រូវការជំនួយ និងធនធានកីឡាករខ្លាំងណាស់នៅជុំវិញពិភពលោក»។

ទន្ទឹមគ្នានោះ សហព័ន្ធកីឡាបាល់ទាត់ប្រេស៊ីល (CBF) ក៏បានអំពាវនាវដល់បណ្តាក្លឹបអាជីពទាំងឡាយជួយផ្តល់ កីឡាករជាលក្ខណៈខ្ចីជើង (លេងឥតគិតថ្លៃ) ដល់ក្លឹបជាសមាជិក Chapecoense ផងដែរ និងចេញសេចក្តីថ្លែងការណ៍ ថា «ក្លឹប Chapecoense នឹងបន្តលេងនៅក្នុងក្របខណ្ឌកំពូលប្រេស៊ីល Serie A ៣រដូវកាលជាប់គ្នាទៀតផង ចាប់ពីឆ្នាំនេះតទៅ»។

ក្នុងសេចក្តីថ្លែងការណ៍របស់ CBF ខាងលើដដែលក៏បានបន្ថែមទៀតថា «សហព័ន្ធ នឹងឧបត្ថម្ភទឹកប្រាក់ ៧.៣លានដុល្លារ ដែលបានពីការលក់សិទ្ធិផ្សាយបន្តផ្ទាល់ដល់ក្លឹប Chapecoense ដើម្បីយកលុយនេះទិញកីឡាករ ល្បីៗមកពង្រឹងក្លឹបឡើងវិញក្នុងរដូវកាលដោះដូរកីឡាករនាខែមករា ឆ្នាំ២០១៧ ខាងមុខ»។

ក្រៅពីនេះ ក្លឹបអាជីព Benfica របស់ប្រទេសព័រទុយហ្គាល់ ក៏បានប្រកាសថា នឹងបញ្ជូនកីឡាកររបស់ខ្លួនមួយចំនួនឲ្យ មកលេងនៅក្លឹបស្ថិតក្នុងតំបន់អាមេរិកឡាទីនថែមទៀតផង ក្រៅពីតារាឆ្នើមរបស់ពិភពលោក Cristiano Roanldo បាន ឧបត្ថម្ភប្រាក់ផ្ទាល់ខ្លួន ៣.១លានដុល្លារដល់ក្លឹប Chapecoense ក្រោយពីទទួលបានដំណឹងដ៏តក់ស្លុតនេះ៕