(កូឡុំប៊ី)៖ ប្រធានាធិបតីកូឡុំប៊ីលោក Juan Manuel Santos នៅថ្ងៃពុធនេះបានសម្តែងការចូលរួម​សោកស្តាយ​យ៉ាងជ្រាលជ្រៅជាទីបំផុតចំពោះការធ្លាក់ យន្តហោះដឹកក្រុមកីឡាករបាល់ទាល់ប្រេស៊ីល នៅក្នុងប្រទេសរបស់លោក ដែលផ្តាច់យកជីវិតមនុស្សដល់ទៅចំនួន៧១នាក់។ នេះបើតាមការចេញផ្សាយ​ដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាព្រឹកថ្ងៃពុធ ទី៣០ ខែវិច្ឆិកា ឆ្នាំ២០១៦។

លោក Santos បានបង្ហោះសាររំលែកទុក្ខនៅលើបណ្តាញទំនាក់ទំនងសង្គម ​Twitter ថា «សោកនាដកម្មដ៏​អាក្រក់នេះបានធ្វើឲ្យប្រជាជាតិកូឡុំប៊ីមានទុក្ខក្រៀមក្រំយ៉ាងខ្លាំង ហើយយើងសោកស្តាយបំផុតចំពោះ​គ្រោះថ្នាក់ដែលបានកើតមានឡើងចំពោះយន្តហោះ ដែលដឹកក្លឹបបាល់ទាល់ Chapecoense របស់ប្រទេសប្រស៊ីលនេះ»

យន្តហោះខាងលើនេះបានធ្វើដំណើរពីប្រទេសប្រេស៊ីល សំដៅទៅអាកាសយានដ្ឋាន Medellin នៃប្រទេសកូឡុំប៊ី ដែលនៅលើនោះដឹកក្រុមកីឡាករបាល់ទាត់ឈ្មោះ Chapecoense ទៅចូលរួមលេង​ក្នុងកម្មវិធីប្រកួត Copa Sudamerica វគ្គបញ្ចប់ជាមួយនឹងក្រុម Atletico Nacional នៅទីក្រុង Medellin នៃប្រទេសកូឡុំប៊ី ដែលគ្រោងប្រារព្ធ​ឡើងនៅថ្ងៃពុធនេះ៕