(ម៉ានីល)៖ ការប៉ះទង្គិចដោយអាវុធរវាងកងកម្លាំងរដ្ឋាភិបាល និងក្រុមភេរវករនៅក្នុងខេត្ត Lanao del Sur ភាគខាងត្បូងប្រទេសហ្វីលីពីននៅតែបន្ត ជាមួយនិងចំនួនសរុបនៃពួក​សកម្មប្រយុទ្ធដែល​ត្រូវបានសម្លាប់​បានកើនដល់ ១៩នាក់ហើយគិតត្រឹមថ្ងៃចន្ទនេះ។ នេះបើតាមមន្ត្រីយោធាហ្វីលីពីនចេញផ្សាយដោយ​ទីភ្នាក់ងារព័ត៌មានចិនស៊ិនហួរ នៅមុននេះបន្តិចនារសៀលថ្ងៃចន្ទ ទី២៨ ខែវិច្ឆិកា ឆ្នាំ២០១៦។

អ្នកនាំពាក្យកងទ័ពជើងគោកនៃប្រទេសហ្វីលីពីន លោកឧត្តមសេនីយ៍ត្រី Restituto Padilla បានឲ្យដឹងថា ពលទាហានចំនួន ១៣រូបរបស់រដ្ឋាភិបាលបាន​ទទួលរងរបួសនៅក្នុងហេតុការណ៍​ប៉ះទង្គិចគ្នាថ្មីមួយទៀត ជាមួយនឹងពួក Maute ដែលបច្ចុប្បន្នកំពុងកាន់កាប់ក្រុង Butig ហើយលោក Padilla បាននិយាយថា «ចំនួននៃអ្នករងគ្រោះប្រហែលជា​នឹងបន្តកើនឡើង​បន្ថែមទៀត នៅចុងបញ្ចប់នៃប្រតិបត្តិការនាថ្ងៃនេះ»។

គួរបញ្ជាក់ថាកងកម្លាំងយោធាហ្វីលីពីនបានចាប់ផ្តើមប្រតិបត្តិការ កម្ចាត់ក្រុមសកម្មប្រយុទ្ធដែលមានគ្នា​ប្រមាណ​ជា ៣០០នាក់បន្ទាប់ពីពួកគេបានដណ្តើមកាន់កាប់សាលាក្រុង Butag កាលពីថ្ងៃ២៦ ខែវិច្ឆិកាមក ហើយពួកក្រុមសកម្មប្រយុទ្ធ Maute ដែលគាំទ្រពួករដ្ឋអ៊ីស្លាម ISIS នេះ គឺជាអ្នកទទួលត្រូវចំពោះការបោក​គ្រាប់បែក​ និងឆក់ប្លន់ដែលកំពុងកើនឡើងយ៉ាងខ្លាំងក្លា នៅភាគខាងត្បូងនៃប្រទេសហ្វីលីពីនដោយរួម​បញ្ចូលទាំង​ការបំផ្ទុះគ្រាប់នៅក្នុងទីក្រុង Davao ដែលជាកន្លែងកំណើតរបស់ប្រធានាធិបតីហ្វីលីពីន លោក រ៉ូឌ្រីហ្គោ ឌូធើតេ កាលពីថ្ងៃទី០២ ខែកញ្ញាថែមទៀតផង ហើយកាលនោះមនុស្សចំនួន ១៥បានស្លាប់​បាត់បង់ជីវិត ខណៈ ៧០នាក់ផ្សេងទៀតបានទទួលរងរបួសយ៉ាងដំណំ៕