(អាមេរិក)៖ ក្រុមហ៊ុននៃបណ្តាញទំនាក់ទំនងសង្គម Facebook មានមូលដ្ឋាននៅសហរដ្ឋអាមេរិក ស្ងាត់ៗបានអភិវឌ្ឍន៍​ នូវកម្មវិធីចាប់បទល្មើសដោយស្វ័យប្រវត្តិមួយ ដែលទំនងជាអាចបញ្ចុះបញ្ចូលឲ្យ​ប្រទេសចិនផ្តល់សិទ្ធិអនុញ្ញាត ដល់បណ្តាញទំនាក់ទំនងសង្គមដ៏ធំជាងគេលើលោកនេះ មានវត្តមាននៅ​ក្នុងប្រទេសមហាអំណាចសេដ្ឋកិច្ច ពិភពលោកទីពីរ ដែលមានប្រជាជនប្រមាណជា ១.៤ពាន់លាននាក់​នេះវិញ បន្ទាប់ពីត្រូវបានហាមឃាត់អស់រយៈពេល ០៧ឆ្នាំមក។ នេះបើតាមកាសែត New York Times ចេញផ្សាយបន្តដោយសារទីភ្នាក់ងារព័ត៌មាន Reuters នៅមុននេះបន្តិចនាព្រឹកថ្ងៃពុធ ទី២៣

ខែវិច្ឆិកា ឆ្នាំ២០១៦។

ប្រភពដដែលបានឲ្យដឹងថា ក្រុមហ៊ុនបណ្តាញសង្គមយក្ស Facebook បានបង្កើតនូវកូនកម្មវិធីមួយ ដែល​មានសមត្ថភាពកំណត់មិនឲ្យការបង្ហោះ (Posts) បង្ហាញនៅលើផ្ទាំងព័ត៌មានថ្មីៗ (News Feeds) របស់អ្នកប្រើប្រាស់នៅតាមតំបន់ណាមួយបាន ដោយមានការជួយជ្រោមជ្រែងពីសំណាក់នាយកប្រតិបត្តិ​ និងជាបិតាស្ថានិកផ្ទាល់គឺលោក Mark Zuckerberg ហើយកាលពីខែមីនា មហាសេដ្ឋីវ័យក្មេងរូបនេះ ក៏បានជួបពិភាក្សាជាមួយនឹងមន្រ្តីជាន់ខ្ពស់ចិនលោក Liu Yunshan ស្ថិតក្នុងក្តីសង្ឃឹមថា​ក្រុមហ៊ុន Facebook និងបណ្តាក្រុមហ៊ុនផ្តល់សេវាអ៊ីនធឺណែត នៅក្នុងប្រទេសចិនអាចនឹងមាន
ទំនាក់ទំនងកាន់តែប្រសើរផងដែរ។

កម្មវិធីថ្មីនេះនឹងអនុញ្ញាតឲ្យភាគីទីបី (ក្រៅពីក្រុមហ៊ុន និងអ្នកប្រើប្រាស់) ធ្វើការឃ្លាំមើលនូវសាច់រឿងនិង​ប្រធានបទដ៏ក្តៅគគុកនានា ដែលអ្នកប្រើប្រាស់បានបង្ហោះ និងចែករំលែកនៅជុំវិញបណ្តាញ​សង្គម Facebook ដោយភាគីទីបីនឹងមានសិទ្ធិគ្រប់គ្រងទាំងស្រុង ក្នុងការសម្រេចថាតើ Posts ទាំងអស់នោះ​គួរតែត្រូវបង្ហាញនៅលើ News Feeds របស់អ្នកប្រើប្រាស់ដែរឬយ៉ាងណា ប៉ុន្តែពុំទាន់មានសញ្ញា​ណាមួយបញ្ជាក់ថាក្រុមហ៊ុន Facebook បានផ្តល់កម្មវិធីចាប់ពិរុទ្ធភាពនេះ ទៅកាន់អាជ្ញាធរ​ប្រទេសចិននៅឡើយទេ។

គួរបញ្ជាក់ថានៅក្នុងប្រទេសចិន បណ្តាញទំនាក់ទំនងសង្គមដែលកំពុងឈានផ្តាច់មុខគេនេះ ត្រូវបានបិទជាអចិន្រ្តៃយ៍នៅក្រោយការធ្វើបះបោរ ក្នុងទីក្រុង Urumqi នៃតំបន់ស្វ័យយ័ត Xinjiang កាលពីឆ្នាំ២០០៩ ដោយសារតែកាលនោះ ពួកសកម្មជនឯករាជ្យបានប្រើប្រាស់ Facebook ជាផ្នែកមួយនៃមធ្យោបាយទាក់ទងរបស់ពួកគេ៕