(សេអ៊ូល)៖ កូរ៉េខាងជើងទំនងជាកំពុងតែធ្វើការសាកល្បងស្វែងរកទិសដៅនៃគោលនយោបាយ​របស់សហរដ្ឋអាមេរិកចំពោះទីក្រុងព្យុងយ៉ាង នៅមុខការផ្លាស់ប្តូររដ្ឋបាលថ្មីនៃទីក្រុង​វ៉ាស៊ីនតោន ដែលលោក ដូណាល់ ត្រាំ នឹងឡើងចូលស្បថកាន់តំណែងជាប្រធានាធិបតីអាមេរិកថ្មី បន្ទាប់ពីលោក បារ៉ាក់ អូបាម៉ា នៅថ្ងៃទី២០ ខែមករា ឆ្នាំ២០១៧។ នេះបើតាមការចេញផ្សាយដោយទីភ្នាក់ងារព័ត៌មាន​កូរ៉េខាងត្បូង យុនហ៉ាប់ នៅមុននេះបន្តិចនាល្ងាចថ្ងៃអង្គារ ទី២២ ខែវិច្ឆិកា ឆ្នាំ២០១៦។

ការលើកឡើងបែបនេះត្រូវបានធ្វើឡើងដោយក្រសួងការបរទេសកូរ៉េខាងត្បូង ដើម្បីជាការឆ្លើយតបទៅ​នឹង​សេចក្តីថ្លែងការណ៍របស់​ទីក្រុងព្យុងយ៉ាង ដែលបានចេញនៅម្សិលមិញនេះ ដោយនៅក្នុងនោះប្រទេស​កូរ៉េ​ខាងជើងបានអះអាងថា នៅក្នុងរយៈពេលចំនួនប្រាំឆ្នាំ​ចុងក្រោយនេះ​បន្ទាប់ពីអតីតមេ​ដឹកនាំ​លោក គីម ជុងអ៊ីល បានទទួលមរណភាពទៅ ប្រទេសកុម្មុយនិស្ត​ដ៏ឯកោមួយនេះ​បានប្រឈមមុខកាន់​តែខ្លាំង​ជាមួយ​សហរដ្ឋអាមេរិក ដើម្បីទប់ទល់នឹងការ​គំរាមកំហែង​ក៏ដូចជាការឈ្លានពាន​ឥតឈប់ឈរ​ពីសំណាក់​​ទីក្រុងវ៉ា​ស៊ីនតោន។

ជារឿយៗកូរ៉េខាងជើងបានអះអាងដូច្នេះថា «គោលនយោបាយដ៏​គ្រោះថ្នាក់ និងការគំរាមកំហែងផ្នែក​អាវុធនុយក្លេអ៊ែររបស់សហរដ្ឋអាមេរិកប្រឆាំងនឹងកូរ៉េខាងជើង គឺកាន់តែជំ​រុញ​ឲ្យ​​ទី​ក្រុងព្យុងយ៉ាង​ចាត់វិធាន​ការទប់ទល់ដែលប្រកបដោយ​ភាពត្រឹមត្រូវនិងសុច្ចរិតថែមទៀតប៉ុណ្ណោះ ដែលអ្វីៗទាំងអស់នេះគឺភាគីអាមេរិកជាអ្នកបង្កឡើងទាំងស្រុង»

អ្នកនាំពាក្យរដ្ឋមន្រ្តីការបរទេសកូរ៉េខាងត្បូងលោក Cho June-hyuck បានថ្លែងនៅក្នុងសន្និសីទ​សារព័ត៌មានមួយថា «នៅក្រោយពេលដែលការបោះ​ឆ្នោតជ្រើសរើសប្រធានាធិបតី​អាមេរិក​ទើបតែបាន​​បញ្ចប់ទៅថ្មីៗ ប្រទេសកូរ៉េខាងជើងបានព្យាយាមដាក់សម្ពាធ​ដោយប្រយោលទៅ​លើរដ្ឋបាលថ្ម​របស់​​ប្រទេសមហាអំណាច​មួយនេះ ដើម្បីឲ្យពួកគេផ្លាស់ប្តូរ​នយោបាយ​មកលើ​ឧបទ្វីបកូរ៉េ ហើយខណៈពេល​នេះទីក្រុងព្យុងយ៉ាងទំនងជាកំពុងធ្វើការស្ទាបស្ទង់ ចំពោះអនាគតរដ្ឋាភិបាលអាមេរិកថ្មី នៅក្នុងទម្រង់ជាអនុស្សរណៈ​របស់ក្រសួងការបរទេសខ្លួន នៅមុនពេលលោក ដូណាល់ ត្រាំ ចូលស្បថកាន់តំណែងជាប្រធានាធិបតីទី៤៥ នៃសហរដ្ឋអាមេរិក»។

គួរបញ្ជាក់តាមលោក Cho ដែរថាប្រទេសកូរ៉េខាងត្បូងនឹងនៅតែបន្តសហការជាមួយសម្ព័ន្ធមិត្ត​អាមេរិក​ជានិច្ចដើម្បីដាក់សម្ពាធព្រមទាំងទណ្ឌកម្មបន្ថែម​ទៀតទៅលើកូរ៉េខាងជើងរហូតទាល់តែ​ប្រទេស​មួយនេះ អស់ជម្រើសក្រៅពីបោះបង់ ការអភិវឌ្ឍនៃកម្មវិធីអាវុធនុយក្លេអ៊ែររបស់ខ្លួនចោល៕