(​មូស្គូ)៖ បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន ព្រមានចាត់វិធានការចំពោះសកម្មភាពរបស់​អង្គការ NATO នៅអឺរ៉ុបខាងកើតមិនទាន់ទំាងបានមួយថ្ងៃស្រួលបួលផង ប្រព័ន្ធផ្សព្វផ្សាយជាច្រើន​ក្នុងទីក្រុងមូស្គូ បាននំាគ្នាចុះផ្សាយព្រោងព្រាតថា វិមានក្រឹមឡាំង មានគំរោងនឹងដាក់ពង្រាយប្រព័ន្ធខែល​ការពារមីស៊ីល K-300P Bastion-P នៅទីក្រុង Kaliningrad ជាទឹករុស្ស៊ីដែលអាចចាត់ទុកបានថាជា​បេះដូង​របស់សហភាពអឺរ៉ុប ប៉ុន្តែភ្លាមៗព័ត៌មានេះពុំទាន់ត្រូវបានទទួលស្គាល់ជាផ្លូវការនៅឡើយទេ។ នេះបើតាមការចេញផ្សាយរបស់សារព័ត៌មាន Sputnik​​ នៅព្រឹកថ្ងៃអង្គារ ទី២២ ខែវិច្ឆិកា ឆ្នាំ២០១៦។

យោងតាមប្រព័ន្ធផ្សព្វផ្សាយរុស្ស៊ី ប្រព័ន្ធខែលការពារមីស៊ីល K-300P Bastion-P នឹងត្រូវបំពាក់ដល់​កងទ័ពជើង​ទឹករុស្ស៊ីនៅតំបន់សមុទ្របាល់ទិច នៅក្នុងក្របខ័ណ្ឌនៃការឆ្លើយ​តបទៅនឹងការបង្កើនវត្តមាន​យោធា​របស់អង្គការណាតូ នៅតាមបណ្ដាប្រទេសបាល់ទិចជាប់របងជាមួយរុស្ស៊ី។ អ្វីដែលគួរឱ្យកត់សម្គាល់​ នៅចុងខែវិច្ឆិកានេះទីក្រុងឡុងដ៍ គ្រោងនឹង​បញ្ជូនយោធា និងបរិក្ខាយោធាធុនធ្ងន់​ទៅកាន់ប្រទេសអេស្ដូនី ខណៈបារំាងក៏បាន​សន្យាផងដែរថា នឹងបញ្ជូនយោធា ៣០០នាក់ និងរថក្រោះ៥គ្រឿង ឱ្យប្រទេសក្នុងតំបន់បាល់​ទិចមួយនេះនៅឆ្នាំ២០១៧។

ជាងនេះទៅទៀតកាលនៅអំឡុងកិច្ចប្រជុំក្នុងទីក្រុងវ៉ាសូវី ប្រទេសប៉ូឡូញ អង្គការណាតូបានសម្រេ​​ចិត្ត​ថា​នឹងបញ្ជូន​អង្គភាពយោធា​ចំរុះជាតិសាសន៍​ចំនួន០៤ មានកងកម្លាំងទ័ព ១,០០០នាក់ទៅកាន់​ប្រទេស​ប៉ូឡូញ និងប្រទេសក្នុងតំបន់បាល់ទិច ក្រោមការដឹកនាំដោយ សហរដ្ឋអាមេរិក អាល្លឺម៉ង់ កាណាដា និងអង់គ្លេស។ ​

គួរបញ្ជាក់ថាបើតាមទីក្រុងមូស្គូ អង្គការណាតូបានបង្កើនវត្តមានយោធា​នៅតាមបណ្ដាប្រទេស​អឺរ៉ុប​ខាងកើតដែលមានព្រំប្រទល់​ជាប់នឹងរុស្ស៊ី ចាប់តាំងពីឆ្នាំ២០១៤ មកដោយ​ប្រើហេតុផលថា រុស្ស៊ីបានលូកដៃចូលក្នុងវិបត្តិនៅ​អ៊ុយក្រែន។ ប៉ុន្តែរុស្ស៊ីផ្ទាល់បានបដិសេធម្ដងហើយម្ដងទៀត ព្រមទាំងព្រមានថាការពង្រីកឥទ្ធិពលយោធានេះ នឹងបង្កជាផលវិបាកយ៉ាងធ្ងន់ធ្ងរ និងប៉ះពាល់យ៉ាងខ្លំាង​​ដល់សន្តិភាពដែល​នឹងអាចជំរុញឱ្យទីក្រុងមូស្គូ ប្រើប្រាស់គ្រប់មធ្យោបាយ​រួមមានទំាងយោធាផងដែរ ជាការឆ្លើយតបនឹង​ការគំរាមកំហែងទំាងឡាយ៕