(វ៉ាស៊ីនតោន)៖ លោក ដូណាល់ ត្រាំ ប្រធានាធិបតីជាប់ឆ្នោតរបស់សហរដ្ឋអាមេរិក បានឲ្យដឹងនៅថ្ងៃអង្គារនេះថា លោកនឹងលុបចោលនូវកិច្ចព្រមព្រៀងពាណិជ្ជកម្ម នៃភាពជាដៃគូអន្តរប៉ាស៊ីហ្វិក (TPP) (Trans-Pacific Partnership) និង បោសសម្អាតសេតវិមាន ភ្លាមៗនៅថ្ងៃដែលចូលស្បថកាន់តំណែងជាប្រធានាធិបតីថ្មី របស់សហរដ្ឋអាមេរិកតែម្តង ដែលទង្វើនេះវាដូចទៅនឹងអ្វីដែលលោក ត្រាំ ធ្លាប់បានសន្យាកាលពីអំឡុងយុទ្ធនាការឃោសនាបោះឆ្នោត នេះបើតាមការចេញផ្សាយ ដោយសារព័ត៌មាន Channel News Asia នៅមុននេះបន្តិចនាព្រឹកថ្ងៃអង្គារ ទី២២ ខែវិច្ឆិកា ឆ្នាំ២០១៦។
លោក ដូណាល់ ត្រាំ ប្រធានាធិបតីសហរដ្ឋអាមេរិក ដែលធ្លាប់រងការវាយប្រហារពីលោក សម រង្ស៊ី ថា ជាជនផ្តាច់ការ បានថ្លែងនៅក្នុងសារជាវីដេអូ រៀបរាប់អំពីការងារដែលលោកនឹងបំពេញនៅក្នុងរយៈពេល ១០០ថ្ងៃដំបូងនៅឯសេតវិមាន, ដោយលោកបាននិយាយថា «ខ្ញុំបានស្នើឲ្យក្រុមការងាររបស់ខ្ញុំ បង្កើតនូវបញ្ជីនៃសកម្មភាពចម្បងៗដែលពួកយើងអាចនឹង អនុវត្តន៍បាននៅថ្ងៃដឹកនាំប្រទេសដំបូងដើម្បីស្តារច្បាប់ និងនាំយក ការងាររបស់ប្រជាជនអាមេរិកមកវិញ ចំណែកឯរឿងវិស័យពាណិជ្ជកម្មវិញខ្ញុំ នឹងចេញដំណឹងបញ្ជាក់ពីគោលបំណងក្នុងការលុបកិច្ចព្រមព្រៀង TPP (Trans-Pacific Partnership) ដែលប្រៀបដូចជាគ្រោះមហន្តរាយដ៏ធំធេងចំពោះសហរដ្ឋអាមេរិកចោល ហើយងាកមករកការចរចាលើកិច្ចព្រមព្រៀងដែលនឹងនាំយកការងារព្រមទាំងឧស្សាហកម្មមកកាន់ទឹកដីអាមេរិកវិញ»។
គួរបញ្ជាក់ដែរថា នៅក្នុងអំឡុងយុទ្ធនាការឃោសនាបោះឆ្នោតលោក ដូណាល់ ត្រាំ បានសន្យាថានឹងការពារការងាររបស់ប្រជាជនអាមេរិកប្រឆាំងនឹងកម្លាំងពលករ ដែលមានតម្លៃថោក នៅតាមបណ្តាប្រទេសមួយចំនួនរួមមានចិន និងម៉ិកស៊ិកូជាដើម ហើយលោក ត្រាំ បានអះអាងថា អ្វីៗដែលលោកធ្វើគឺផ្អែកទៅលើគោលការណ៍ ស្នូលដ៏សាមញ្ញបំផុតដោយ «យកប្រជាជនអាមេរិកជាធំ»។ ដោយឡែកការដែលលោកប្រុងនឹងលុបចោលនូវកិច្ចព្រមព្រៀង TTP នេះគឺជាគោលនយោបាយ មួយក្នុងចំណោមគោលដៅ០៦ ដែលលោក ដូណាល់ ត្រាំ បានសន្យាថានឹងអនុវត្តន៍ភ្លាមៗនៅពេលដែលចូលកាន់តំណែងជា ប្រធានាធិបតីទី៤៥ របស់សហរដ្ឋអាមេរិកជាផ្លូវការនៅថ្ងៃទី២០ ខែមករា ឆ្នាំ២០១៧ខាងមុខនេះ៕ (សូមស្តាប់លោក ដូណាល់ ត្រាំ)៖
