(ហាណូយ)៖ ក្រសួងពាណិជ្ជកម្មវៀតណាមបានឱ្យដឹងថា ប្រទេសអាស៊ានមួយនេះទំនងជានឹងមិនអាច​ឈានដល់នូវវត្ថុបំណងរបស់ខ្លួន ដែលចង់សម្រេចឱ្យបានកំណើន ១០ភាគរយនៃការ​នាំចេញនៅ​ឆ្នាំ​២០១៦។ នេះតាមការចេញផ្សាយដោយទីភ្នាក់ងារសារព័ត៌មានចិន ស៊ិនហួរ នៅរសៀលថ្ងៃចន្ទ ទី២១ ខែវិច្ឆិកា ឆ្នាំ២០១៦។

ជុំវិញការរំពឹងទុកនេះដែរ រដ្ឋមន្ត្រីឧស្សាហកម្ម និងពាណិជ្ជកម្មវៀតណាម លោក Tran Tuan Anh បានគូសបញ្ជាក់ថា គិតត្រឹម១០ខែដំបូងក្នុងឆ្នាំ២០១៦ ការនាំចេញសរុបរបស់វៀតណាមមានទំហំ​១៤៣.៩ពាន់លានដុល្លារ ឬកើនឡើង៧ភាគរយបើធៀបទៅនឹងរយៈពេលដូចគ្នានៅឆ្នាំ២០១៥ ស្របពេលដែលវិស័យកសិកម្ម រុក្ខាប្រមាញ់ និងនេសាទ បានទទួលកំណើននាំចេញ ៧.៩ភាគរយ ឬស្មើនឹង ១៨.៣ពាន់លានដុល្លារ បន្ទាប់ពីធ្លាប់បានថយចុះអស់ ៩.៧ភាគរយកាលពីឆ្នាំ២០១៥។

ទោះជាយ៉ាងនេះក្ដីលោក Tran Tuan Anh វាយតម្លៃថា វៀតណាមទំនងជានឹងមិនអាចឈានដល់នូវ វត្ថុបំណងរបស់ខ្លួន ដែលចង់សម្រេចឱ្យបានកំណើន ១០ភាគរយ នៃការវិស័យនាំចេញ​នៅឆ្នាំ២០១៦ នេះទេ ដោយសារតែអស្ថេរភាពនយោបាយ​នៃទីផ្សារនាំចេញ ដែលកំពុងមានការប្រ​កួតប្រជែងខ្លំាង ខណៈតម្រូវការ និងតម្លៃកំពុងមានការថយចុះ៕