(ប៉េកាំង)៖ សាខាក្រុមហ៊ុន Apple នៅក្នុងប្រទេសចិន បានប្រកាសថានឹងធ្វើការផ្លាស់ប្តូរថ្មដល់អតិថិជន​ទូរស័ព្ទដៃ iPhone ម៉ូដែលមួយចំនួនដែលបានរលត់ភ្លាមៗដោយមិនដឹងមូលហេតុ។ នេះបើតាមការ​ចេញផ្សាយដោយទីភ្នាក់ងារព័ត៌មានចិនស៊ិនហួរ  នៅមុននេះបន្តិចនារសៀលថ្ងៃចន្ទ ទី២១ ខែវិច្ឆិកា ឆ្នាំ២០១៦។

អតិថិជនចិននៅទូទាំងប្រទេសបានបង្ហាញពីការត្អូញត្អែរ តាមរយៈបណ្តាញទំនាក់ទំនងសង្គម Weibo ថាទូរស័ព្ទដៃ iPhone 6s  របស់ពួកគេនៅសុខៗស្រាប់តែរលត់បិទភ្លាមៗ ទោះបីជាថ្មទូរស័ព្ទ​នៅសល់​ដល់​ទៅ ៥០ភាគរយក៏ដោយ ហើយនៅដើមសប្តាហ៍មុននេះ សមាគមអ្នកប្រើប្រាស់ចិន «China Consumer Association» បានផ្ញើលិខិតទៅកាន់ក្រុមហ៊ុន Apple ដើម្បីទាមទារឲ្យ​មានបញ្ជាក់អំពីបញ្ហានេះជាផ្លូវការ។

មកដល់ព្រឹកថ្ងៃចន្ទសប្តាហ៍ថ្មីនេះ សាខាក្រុមហ៊ុនសញ្ញាផ្លែប៉ោមនៅប្រទេសចិន បានយល់ព្រមធ្វើការ​ផ្លាស់ប្តូរ​​ថ្មថ្មីដោយឥតគិតថ្លៃ ចំពោះទូរស័ព្ទដៃ iPhone 6s ដែលត្រូវបានផលិតឡើង​នៅចន្លោះខែ​កញ្ញា​និងខែតុលា ឆ្នាំ២០១៥ ប៉ុន្តែ iPhone ម៉ូដែលផ្សេងទៀត ដែលជួបបញ្ហាដូចគ្នានោះ មិនត្រូវបានរាប់បញ្ចូល​នៅក្នុងគំរោងផ្លាស់​ប្តូរបច្ចុប្បន្ននេះឡើយ។ យ៉ាងណា​ក៏ដោយក្រុមហ៊ុន Apple សាខាប្រទេសចិន មិនបានបញ្ជាក់ថាដោយ​សារថ្មមានបញ្ហា ឬក៏មកពីទូរស័ព្ទមានបញ្ហាអ្វី​ឲ្យប្រាកដនោះឡើយ៕