(គូឡាឡាំពួរ)៖ បាតុករប្រឆាំងរដ្ឋាភិបាលរាប់ពាន់នាក់ បានប្រមូលផ្តុំគ្នាដើរដង្ហែរក្បួននៅក្នុងរដ្ឋធានីគូឡាឡាំពួរនៅថ្ងៃសៅរ៍នេះ ដើម្បីទាមទារឲ្យនាយករដ្ឋមន្រ្តីនៃប្រទេសម៉ាឡេស៊ីលោក Najib Razak ចុះចេញពីតំណែង ដោយសារតែមានការចោទប្រកាន់ពាក់ព័ន្ធនឹង រឿងអាស្រូវនៃការកេងចំណេញលុយរាប់ពាន់លានដុល្លារ។ នេះបើតាមការចេញផ្សាយដោយទីភ្នាក់ងារព័ត៌មាន Retuers នៅមុននេះបន្តិចនារសៀលថ្ងៃសៅរ៍ ទី១៩ ខែវិច្ឆិកា ឆ្នាំ២០១៦។
លោក Shahrul Aman Shaari អនុប្រធានរៀបចំការធ្វើបាតុកម្មទ្រង់ធំនេះបាននិយាយទៅកាន់ក្រុមអ្នកតវ៉ាថា «ពួកយើងមិនមានធ្វើបែបនេះដើម្បីផ្តួលរំលំប្រទេសទាំងមូលនោះឡើយ ត្បិតពួកយើងស្រឡាញ់ប្រទេសនេះខ្លាំងណាស់ ហើយពួកយើងក៏មិនមែនមកប្រមូលផ្តុំគ្នានៅទីនេះ ដើម្បីតែទម្លាក់រដ្ឋាភិបាលដែរ ប៉ុន្តែដើម្បីធ្វើឲ្យវាមានភាពរឹងមាំឡើងវិញ ដោយសារប្រទេសម៉ាឡេស៊ីសព្វថ្ងៃនេះកំពុងស្ថិតក្រោមការដឹកនាំរបស់ជនបោកប្រាស់មិនស្មោះត្រង់»។
យ៉ាងណាមិញការធ្វើបាតុកម្មតវ៉ានេះទំនងជានឹង មិនធ្វើឲ្យតំណែងជានាយករដ្ឋមន្រ្តីម៉ាឡេស៊ីរបស់លោក Najib Razak ដែលបានបដិសេធចំពោះកំហុសចោទប្រកាន់អ្វីទាំងអស់នោះ មានភាពរង្គោះរង្គើបានឡើយហើយលោក Najib បានចាត់ទុកទង្វើនេះថាជា «ឧបករណ៍របស់គណបក្សប្រឆាំង» និងចោទថាចលនាមួយនេះគឺពោរពេញទៅដោយល្បិចកល ព្រោះថាបាតុករទាំងនោះការពិតទៅសុទ្ធតែជាពួកក្រុមប្រឆាំងដែលបន្លំខ្លួនជាអង្គការឯករាជ្យក្រៅរដ្ឋាភិបាល ដើម្បីបណ្តេញមន្រ្តីរដ្ឋាភិបាលដែលជាប់ឆ្នោតតាមលទ្ធិប្រជាធិបតេយ្យស្របច្បាប់។
គួរបញ្ជាក់ដែរថា នៅមុនការធ្វើបាតុកម្មដ៏ធំនេះបានប្រព្រឹត្តទៅ ប៉ូលិសម៉ាឡេស៊ីក៏បានធ្វើការចាប់ខ្លួនមនុស្សជាង១០នាក់ផងដែរ ដែលសុទ្ធសឹងតែជាមេខ្លោងបំផុសបំផុលឲ្យមានចលាចលនេះ៕
