(វ៉ាលីងតោន)៖ អាជ្ញាធរការពារស៊ីវិលរបស់ New Zealand បានអះអាងទាំងកណ្តាលយប់ឈានចូល​ថ្ងៃចន្ទ ទី១៤ ខែវិច្ឆិកា ឆ្នាំ២០១៦ (ពេលវេលានៅ ទីក្រុងវ៉ាលីងតោន)ថា រលកយក្សស៊ូណាមិ នឹង​វាយប្រហារពីតំបន់ឆ្នេរ East Cape ទៅ Southland ក្នុងនោះក៏រួមទាំងទីក្រុងវ៉ាលីងតោន និងប្រជុំកោះ Chatham ផងដែរ បន្ទាប់ពីតំបន់នេះ ទើបរងគ្រោះដោយសាររញ្ជួយដីកម្រិត ៧.៨រ៉ិចទ័រនៅមុននេះ។ នេះបើតាមទីភ្នាក់ងារព័ត៌មានចិនស៊ិនហួរ ចេញផ្សាយនៅយប់ថ្ងៃទី១៣ ខែវិច្ឆិកា ឆ្នាំ២០១៦។

គ្រោះរញ្ជួយដីបានប្រហារកោះធំខាងត្បូង នៃប្រទេសនូវែលសេឡង់ នៅវេលាម៉ោង ០០៖០២នាទីយប់ ឈានចូលថ្ងៃទី១៤ ខែវិច្ឆិកា បានបង្កជាការខូចខាតជាច្រើន ដូចបានឃើញតាមរយៈរូបភាពនៅមុន​នេះបន្តិច ប៉ុន្តែសម្រាប់ចំនួនមនុស្សស្លាប់ ឬរងរបួសនោះនៅមិនទាន់មានការរាយការណ៍នោះទេ ខណៈប្រជាជនទាំងអស់​ត្រូវបាន អាជ្ញាធរប្រកាសឲ្យភៀសខ្លួនទៅកាន់ទីទួលខ្ពស់។

គួរបញ្ជាក់ថា កាលពីឆ្នាំ២០១១ គ្រោះរញ្ជួយកម្រិត៦.១រ៉ិចទ័រ បានវាយប្រហារទីក្រុង Christchurch ចម្ងាយពីតំបន់ខាងលើនេះ៩០គីឡូម៉ែត្រ និងបានសម្លាប់មនុស្ស ១៨៥នាក់ឯណោះ៕