(វ៉ាស៊ីនតោន)៖ ទិន្នន័យចុងក្រោយរបស់គេហទំព័រ Wikileaks បានបង្ហាញថា ស្ថានីយ៍ទូរទស្សន៍ CNN មិនមែនត្រឹមតែផ្ដល់កម្រងសំណួរទុកជាមុនដល់លោកស្រី ហ៊ីលឡារី គ្លីនតុន តែប៉ុណ្ណោះទេ ក៏ប៉ុន្តែស្ថានីយ៍មួយនេះ ថែមទាំងបើកដៃឱ្យក្រុមអ្នកប្រជាធិបតេយ្យ ជ្រើសរើសសំណួរដោយខ្លួនឯង សម្រាប់ចោទសួរ លោក ដូណាល់ ត្រាំ​ ទៀតផងនៅក្នុងវេទិការជជែកដេញដោលម្ដងៗ។ នេះបើតាមការចុះផ្សាយរបស់ សារព័ត៌មាន Sputnik នៅមុននេះបន្តិចនាយប់ថ្ងៃចន្ទ ទី០៧ ខែវិច្ឆិកា ឆ្នាំ២០១៦។

យោងតាមគេហទំព័រ Wikileaks នៅក្នុងលិខិតមួយ ចុះថ្ងៃទី២៥ ខែមេសា ឆ្នាំ២០១៥ និងមានចំណងជើងថា «សំណួរសម្រាប់លោកត្រាំនៅ CNN» ក្រុមសមាជិកគណៈកម្មាធិការជាតិប្រជាធិបតេយ្យ បានរៀបចំបញ្ជី បញ្ជាក់លម្អិតពីសំណួរ សម្រាប់សួរលោកត្រាំ ដោយក្នុងនោះមានទំាងសំណួរដ៏រសើបមួយចំនួនផងដែរ ជាឧទាហរណ៍ដូចជាសំណួរដែលថា «តើវាចាំបាច់ដែរឬទេក្នុងការទម្លាក់គ្រាប់បែកលើអារ៉ាប៊ីសាអូឌីត បើសិនជា អារ៉ាប៊ីសាអូឌីត មានជាប់ពាក់ព័ន្ធនឹងការវាយប្រហារភេរវកម្មថ្ងៃទី១១ ខែកញ្ញា ឆ្នាំ២០០១?»។

សូមជំរាបថា កាលពីចុងខែតុលា Wikileaks ក៏ធ្លាប់បានទម្លាយផងដែរ ថាអតីតអ្នកអាត្ថាធិប្បាយនយោបាយ របស់CNN លោកស្រី ដូនណា ប្រាហ្ស៊ីល(Donna Brazile) បានរៀបចំសំណួរទុកជាមុនឱ្យលោកស្រីគ្លីនតុន  នៅក្នុងវេទិកាតស៊ូមតិជាមួយលោក បឺនី សាន់ឌឺ  (Bernie Sanders) នៅឯទីក្រុង Flint នៃរដ្ឋ Michigan កាលដើមខែមីនា កន្លងទៅ៕