(វ៉ាស៉ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃព្រហស្បតិ៍សប្តាហ៍នេះថា លោកមានការរំពឹងទុកលើកិច្ចចរចាពាណិជ្ជកម្ម រវាងសហរដ្ឋអាមេរិក និងចិននាចុងសប្តាហ៍នេះ ហើយព្យាករថា ពន្ធគយអាមេរិកដែលដាក់ទម្ងន់លើទីក្រុងប៉េកាំងចំនួន ១៤៥ភាគរយនោះ ទំនងជានឹងថយចុះមកវិញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៩ ខែឧសភា ឆ្នាំ ២០២៥។

លោក ត្រាំ បញ្ជាក់ថា «ពន្ធគយមិនអាចឡើងខ្ពស់ជាងនេះបានទេ។ ឥឡូវមាន ១៤៥ភាគរយ ដូច្នេះវាអាចត្រូវបានបន្ថយមកវិញ។ ខ្ញុំ​គិត​ថា​ វា​នឹងជា​កិច្ចប្រជុំ​​ដ៏រាក់ទាក់។ ពួក​គេ​ទន្ទឹង​រង់ចាំ​ធ្វើ​តាមរបៀបដ៏ល្អ»។ លោកបន្ថែមថា «ខ្ញុំគិតថា យើងនឹងមានថ្ងៃចុងសប្តាហ៍ដ៏ល្អជាមួយចិន។ ខ្ញុំគិតថាពួកគេមានផលចំណេញច្រើន។ ខ្ញុំគិតថាពួកគេអាចទទួលបានច្រើនជាងយើង»។

គួរបញ្ជាក់ថា ក្រុមការងាររបស់លោក ត្រាំ បាននិងកំពុងធ្វើការលើកិច្ចព្រមព្រៀងពាណិជ្ជកម្មជាច្រើន បន្ទាប់ពីលោកបានផ្អាកការយកពន្ធទៅវិញទៅមក សម្រាប់ប្រទេសភាគច្រើន ដើម្បីបន្ធូរបន្ថយសង្រ្គាមពាណិជ្ជកម្ម ដែលនាំឱ្យទីផ្សារហិរញ្ញវត្ថុ និង​ប៉ះពាល់ដល់ទំនាក់ទំនងរវាងអាមេរិក ជាមួយសម្ព័ន្ធមិត្ត និងគូប្រជែងរបស់ខ្លួន៕