(តួកគី)៖ នាយករដ្ឋមន្រ្តីនៃប្រទេសតួកគី បានថ្លែងឲ្យដឹងថា មានករណីរថយន្តបំផ្ទុះគ្រាប់បែក នៅភាគខាងត្បូងប្រទេសតួកគី ដោយបានសម្លាប់មនុស្សយ៉ាងតិច៨នាក់ និងរបួសជាង១០០នាក់ នេះបើយោងតាមសារព័ត៌មាន AP ចេញផ្សាយមុននេះបន្តិច។

ពីដំបូងឡើយអាជ្ញាធរតួកគីបានឱ្យដឹងថា មនុស្សយ៉ាងហោចណាស់ម្នាក់បានស្លាប់ និង៣០នាក់ ផ្សេងទៀតរងរបួសរួមទំាងអាគារជាច្រើនខ្នង​ត្រូវបានបំផ្លាញយ៉ាងដំណំនៅ​ក្នុងការវាយប្រហារ​បំផ្ទុះរថយន្ដ​នៅក្បែរទីស្នាក់ការប៉ូលិសមួយកន្លែងក្នុងទីក្រុង Diyarbakirស្ថិតនៅភាគអាគ្នេយ៍នៃប្រទេសដែលសម្បូរទៅដោយ​ជនអំបូរឃើដរស់នៅ។

ជុំវិញការវាយប្រហារនេះដែរពុំទាន់មានក្រុមណាមួយចេញមុខអះអាងទទួលខុសត្រូវនោះទេក៏ប៉ុន្តែបើតាមប្រភព​មួយចំនួននិងពីអាជ្ញាធរតួកគីបានអះអាងថា នេះជាស្នាដៃរបស់គណបក្សពលករឃើដ PKK ខណៈការវាយ​ប្រហារដោយបំផ្ទុះរថយន្ដដ៏ខ្លំាងក្លាយនេះ បានកើតឡើងតែប៉ុន្មានម៉ោងប៉ុណ្ណោះនៅបន្ទាប់មេដឹកនាំឃើដជាច្រើន​នាក់ត្រូវប៉ូលិសតួកគីចាប់ខ្លួន។ ប៉ុន្តែយ៉ាងណាក៏ដោយពុំទាន់​មានព័ត៌មានផ្លូវការបញ្ជាក់​ថាព្រឹត្តិការណ៍ទាំងពីរនេះ​មានជាប់ពាក់ព័ន្ធគ្នានោះទេ។

គួរបញ្ជាក់ថាទីក្រុង Diyarbakir នៃភាគអាគ្នេយ៍ប្រទេសតួកគីសឹងតែក្លាយជាសមរភូមិប្រយុទ្ធជារៀងរាល់ថ្ងៃ រវាងក្រុមសកម្មប្រយុទ្ធឃើដ PKK និងកងកម្លំាងតួកគីទៅហើយ​ក្រោយពីបទឈប់​បាញ់បាន​បរាជ័យ​កាលពីរដូវក្ដៅ ឆ្នាំ២០១៥ ដែល​មានគោលបំណងស្វែងរកសន្តិភាពបញ្ចប់ជម្លោះ​រវាងភាគីទំាងពីរនិងបានបង្កឱ្យមនុស្សច្រើនជាង ៤០,០០០នាក់​បាត់បង់ជីវិតគិតចាប់តាំងពីឆ្នាំ១៩៨៤មក៕