(បាងកក)៖ រដ្ឋាភិបាលយោធានៃប្រទេសថៃ បានដាក់ចេញនូវវិធានដើម្បីជួយប្រជាកសិករដែលតាំងពី ដើមមកគឺជាក្រុមដែលមានអំណាចបំផុតនៅក្នុងនយោបាយរបស់ប្រទេសមួយនេះ ខណៈតម្លៃនៃ ផលដំណាំស្រូវនៅទូទាំងពិភពលោកកំពុងធ្លាក់ចុះខ្លាំង។ នេះបើតាមការចេញផ្សាយរបស់ទីភ្នាក់ងារ ព័ត៌មាន Reuters ដែលដកស្រង់ដោយសារព័ត៌មាន Channel News Asia នៅមុននេះបន្តិច នារសៀលថ្ងៃព្រហស្បតិ៍ ទី០៣ ខែតុលា ឆ្នាំ២០១៦។

នាយករដ្ឋមន្រ្តីថៃ លោក ប្រាយុទ្ធ ចាន់អូចា បានប្រកាសពីវិធានការមួយចំនួនដែលគិតជាទឹកប្រាក់ យ៉ាងហោចជិត៦០ពាន់លានបាត ឬស្មើនឹង១.៧០ពាន់លានដុល្លារ សំដៅដោះស្រាយតម្រូវ​ការទីផ្សារ និងធ្វើឲ្យតម្លៃស្រូវមានស្ថិរភាពឡើងវិញ ហើយសេចក្តីប្រកាសនេះបានដាក់ចេញចំពេលដែលរដ្ឋាភិបាល យោធាថៃកំពុងព្យាយាមធានាឲ្យបាននូវ ការសម្របខ្លួនដោយរលូនមួយ​របស់ប្រទេស​នៅក្រោយការ ចូលទីវង្គតរបស់ព្រះមហាក្សត្រ ព្រះបាទ ភូមិបុល អាប់ឌុលយ៉ាដេត និងធ្វើយ៉ាងណារក្សាស្ថិរភាពនៅ ក្នុងប្រទេសនៅមុនការបោះឆ្នោតជាតិ ដែលនឹងប្រព្រឹត្តនាឆ្នាំ២០១៧ ខាងមុខនេះ។

គួរបញ្ជាក់ដែរថាប្រជាកសិករអ្នកមានៗ នៅក្នុងប្រទេសថៃដែលជាប្រទេសនាំចេញស្រូវអង្ករចំណាត់ថ្នាក់ លេខពីរនៅលើពិភពលោកមួយនេះ គឺជាអ្នកដែលមានឥទ្ធិពល​យ៉ាងខ្លាំងនៅក្នុង​នយោបាយ​ប្រទេសថៃ ហើយពួកគេភាគច្រើនបានជួយឲ្យលោកស្រី យីងឡាក់ ស៊ីណាវ៉ាត់ ឲ្យបានជាប់ឆ្នោតជានាយរដ្ឋមន្រ្តីថៃ កាលពីឆ្នាំ២០១១ ហេតុដូច្នេះហើយទើបរដ្ឋាភិបាលយោធាបច្ចុប្បន្ន ផ្តោតការយក​ចិត្តទុកដាក់សំខាន់ ទៅលើក្រុមកសិករប្រកបដោយឥទ្ធិពលបែបនេះ៕