(សេអ៊ូល)៖ កាលពីថ្ងៃអាទិត្យ ទី៦ ខែមេសា ប្រធានសភានៃប្រទេសកូរ៉េខាងត្បូង បានស្នើឱ្យធ្វើវិសោធនកម្មរដ្ឋធម្មនុញ្ញ ដើម្បីកាត់បន្ថយអំណាចរបស់ប្រធានាធិបតី ហើយលោកបានអះអាងថា ប្រជាជនភាគច្រើនគាំទ្រឱ្យធ្វើបែបនេះ បន្ទាប់ពីប្រធានាធិបតី លោក Yoon Suk Yeol ត្រូវបានដកហូតតំណែង ដោយសារការប្រកាសច្បាប់អាជ្ញាសឹក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។
ប្រធានសភាកូរ៉េខាងត្បូង លោក Woo Won Shik បានលើកឡើងក្នុងសន្និសីទសារព័ត៌មានមួយថា «ខ្ញុំចង់ស្នើឱ្យមានការធ្វើវិសោធនកម្មរដ្ឋធម្មនុញ្ញឆាប់ៗ។ ក្រោយឆ្លងកាត់ ការប្រកាសច្បាប់អាជ្ញាសឹកខុសច្បាប់ផ្ទុយពីរដ្ឋធម្មនុញ្ញ និងការទម្លាក់លោក Yoon ចេញពីអំណាច មតិសាធារណៈទូទៅ ជុំវិញភាពចាំបាច់បន្ទាន់នៃវិសោធនកម្មរដ្ឋធម្មនុញ្ញ គឺកំពុងស្ថិតក្នុងកម្រិតខ្ពស់មិនធ្លាប់មាន»។
លោក Woo ស្នើចង់ឱ្យធ្វើប្រជាមតិថ្នាក់ជាតិស្តីពីវិសោធនកម្មរដ្ឋធម្មនុញ្ញនេះ ស្របពេលគ្នាជាមួយ ការបោះឆ្នោតប្រធានាធិបតី ដែលចាំបាច់ត្រូវតែរៀបចំឡើង ក្នុងរយៈពេល២ខែ ក្រោយការសម្រេចដកតំណែង លោក Yoon ជាផ្លូវការ កាលពីថ្ងៃសុក្រសប្តាហ៍មុន ដោយតុលាការធម្មនុញ្ញ។ តុលាការធម្មនុញ្ញកូរ៉េខាងត្បូង បានសម្រេចចិត្តទទួលយក ការបោះឆ្នោតរបស់សភា ដែលបានដកតំណែងលោក Yoon សម្រាប់ការប្រកាសដាក់ចេញច្បាប់អាជ្ញាសឹករយប៉ុន្មានម៉ោង កាលពីថ្ងៃទី៣ ខែធ្នូ ឆ្នាំ២០២៤ ដែលបង្កជាវិបត្តិនយោបាយដ៏ធ្ងន់ធ្ងរបំផុតមួយ ក្នុងប្រវត្តិសាស្រ្តប្រទេសកូរ៉េខាងត្បូង។
លោក Woo បាននិយាយថា ភាពចលាចលរបស់ប្រទេសជាតិ បានបញ្ចប់ទៅវិញហើយ ជាមួយសេចក្តីសម្រេចរបស់តុលាការធម្មនុញ្ញ ប៉ុន្តែលទ្ធភាពនៃការកើតមានឡើងនូវវិបត្តិដ៏តានតឹង ជុំវិញអំណាចប្រធានាធិបតី នៅតែបន្តមានដដែល។ លោក Woo បានអះអាងថា ប្រជាជនកូរ៉េភាគច្រើន ចង់កែសម្រួលអំណាចប្រធានាធិបតី ដែលមានលក្ខណៈបែបចក្រពត្តិនេះ ដែលលោកចាត់ទុកថា ជាប្រភពនៃជម្លោះនយោបាយដ៏ធ្ងន់ធ្ងរ។
គួរបញ្ជាក់ថា យោងតាមការស្ទង់មតិកាលពីខែមីនា ដោយវិទ្យាស្ថានស្រាវជ្រាវ Gallup Korea អ្នកចូលរួម៥៤ភាគរយ បានបង្ហាញការគាំទ្រឱ្យធ្វើវិសោធនកម្មរដ្ឋធម្មនុញ្ញ ដើម្បីកែសម្រួលប្រព័ន្ធប្រធានាធិបតីរបស់ប្រទេសកូរ៉េខាងត្បូង ខណៈ៣០ភាគរយ និយាយថា វាជារឿងមិនចាំបាច់។ នាពេលនេះ ប្រធានាធិបតីស្តីទី លោក Han Duck Soo និងគណៈកម្មការបោះឆ្នោត កំពុងពិចារណាយកថ្ងៃទី៣ ខែមិថុនា ជាកាលបរិច្ឆេទរៀបចំការបោះឆ្នោតប្រធានាធិបតីថ្មី។ លើកចុងក្រោយបង្អស់ ដែលរដ្ឋធម្មនុញ្ញរបស់កូរ៉េខាងត្បូង ត្រូវបានធ្វើវិសោធនកម្ម គឺកាលពីឆ្នាំ១៩៨៧ ដែលនាំមកនូវ ការបោះឆ្នោតជ្រើសរើសប្រធានាធិបតីលក្ខណៈដោយផ្ទាល់ រួមជាមួយការកំណត់កាន់អំណាច បានត្រឹម១អាណត្តិគត់ មានរយៈពេល៥ឆ្នាំ៕
