(ញូវដែលី)៖ ឥណ្ឌា និងអេមីរ៉ាត់អារ៉ាប់រួមបានព្រមព្រៀងគ្នាក្នុងការអភិវឌ្ឍមជ្ឈមណ្ឌលថាមពល នៅក្នុងប្រទេសស្រីលង្កា ខណៈការប្រកួតប្រជែងឥទ្ធិពលរបស់ទីក្រុងញូវដែលីជាមួយចិន កាន់តែកើនឡើងនៅក្នុងប្រទេសកោះមហាសមុទ្រឥណ្ឌាមួុយនេះ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៥ ខែមេសា ឆ្នាំ ២០២៥។

ក្រសួងការបរទេសឥណ្ឌា ប្រកាសថា ប្រទេសទាំងបីបានចុះហត្ថលេខាលើកិច្ចព្រមព្រៀង អំឡុងដំណើរទស្សនកិច្ចរបស់នាយករដ្ឋមន្ត្រី លោក Narendra Modi ទៅកាន់ស្រីលង្កា ដែលជាលើកទីមួយដោយមេដឹកនាំពិភពលោក ចាប់តាំងពីប្រធានាធិបតី លោក Anura Kumara Dissanayake ចូលកាន់តំណែងក្នុងខែកញ្ញា។

រដ្ឋលេខាធិការក្រសួងការបរទេសឥណ្ឌា លោក Vikram Misri បានប្រាប់អ្នកយកព័ត៌មានក្នុងទីក្រកូឡុំបូថា នឹងមាននូវការសាងសង់បំពង់បង្ហូរប្រេងពហុបំណង ក្នុងមជ្ឈមណ្ឌលថាមពលនៅក្នុងទីក្រុងដ៏សំខាន់ជាយុទ្ធសាស្រ្តរបស់ស្រីលង្កា។ សម្រាប់អេមីរាត់អារ៉ាប់រួមវិញ គឺជាដៃគូយុទ្ធសាស្ត្ររបស់ឥណ្ឌាក្នុងវិស័យថាមពល ដូច្នេះហើយទេីបបង្កេីតឱ្យមានកិច្ចសហការយ៉ាងល្អលើកដំបូង នៅក្នុងតំបន់នាពេលនេះ។

គួរបញ្ជាក់ថា កិច្ចព្រមព្រៀងនាថ្ងៃសៅរ៍នេះ នឹងជំរុញការប្រកួតប្រជែងរបស់ទីក្រុងញូវដែលីជាមួយចិនថែមទៀត តាមរយៈក្រុមហ៊ុនថាមពលរដ្ឋ Sinopec ដែលនឹងសាងសង់រោងចក្រចម្រាញ់ប្រេងតម្លៃ ៣.២ពាន់លានដុល្លារ នៅក្នុងមជ្ឈមណ្ឌលនៃទីក្រុងកំពង់ផែ Hambantota ភាគខាងត្បូងប្រទេសស្រីលង្កា៕