(បាងកក)៖ តុលាការមួយនៅក្នុងប្រទេសថៃ បានចេញដីកាចាប់ខ្លួនសាស្ត្រាចារ្យអាមេរិកម្នាក់ពីបទប្រមាថព្រះមហាក្សត្រថៃ ហើយដែលនេះជាការប្រើប្រាស់ដ៏កម្រនូវច្បាប់ស្ដីការប្រមាថព្រះចេស្ដា ប្រឆាំងនឹងជនបរទេស។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ទីភ្នាក់ងារសារព័ត៌មាន Reuters ដោយផ្អែកលើឯកសារមួយដែលខ្លួនបានពិនិត្យមើល បានឱ្យដឹងកាលពីថ្ងៃសុក្រ ទី៤ ខែមេសាថា យោធាថៃបានដាក់ពាក្យបណ្ដឹង ក្នុងនោះរួមមានទាំងការចោទប្រកាន់ពី បទរំលោភបំពានលើច្បាប់ឧ្រកិដ្ឋកម្មកុំព្យូទ័រប្រឆាំងនឹងលោក Paul Chambers ដែលជាសាស្ត្រាចារ្យម្នាក់នៅឯសាកលវិទ្យាល័យ Naresuan University ហើយដីកាចាប់ខ្លួនត្រូវបានចេញកាលពីថ្ងៃចន្ទ ដើមសប្ដាហ៍កន្លងទៅនេះ។

Reuters ក៏បានផ្ទៀងផ្ទាត់ឯកសារខាងលើជាមួយប៉ូលិសថៃផងដែរ ខណៈមេធាវីរបស់លោក Chambers គឺលោកស្រី Wannaphat Jenroumjit មកពីក្រុមមេធាវីថៃសម្រាប់សិទ្ធិមនុស្សបាននិយាយថា លោក Chambers នឹងត្រូវបង្ហាញខ្លួនចំពោះមុខប៉ូលិសនៅក្នុងទីក្រុង Phitsanulok ស្ថិតនៅភាគខាងជើងប្រទេសថៃ នៅថ្ងៃអង្គារសប្ដាហ៍ក្រោយ។ ប្រភពពីប៉ូលិសថៃបានបន្ថែមថាការចោទប្រកាន់ ខាងលើមានជាប់ពាក់ព័ន្ធនឹងអត្ថបទមួយត្រូវបានបង្ហោះលើអនឡាញដោយលោក Chambers កាលពីឆ្នាំ២០២៤។ តែលោកស្រី Wannaphat បានអះអាងថាលោកស្រីមិនទាន់បានដឹងពីហេតុផល សម្រាប់ការចោទប្រកាន់លើរូបលោក Chambers នោះទេ។

គួរបញ្ជាក់ថា នៅក្នុងប្រទេសថៃ ការប្រមាថព្រះមហាក្សត្រគឺជាទោសធ្ងន់ធ្ងរបំផុតមួយ ដោយអ្នកដែលត្រូវបានរកឃើញថាមានពិរុទ្ធភាពថាបានប្រមាថ ឬគំរាមកំហែងប្រឆាំងនឹងព្រះមហាក្សត្រ Maha Vajiralongkorn និងគ្រួសាររាជវង្សរបស់ព្រះអង្គ អាចនឹងប្រឈមមុខនឹងការកាត់ទោសដាក់ពន្ធនាគារ ១៥ឆ្នាំ៕