(សេអ៊ូល)៖ ប្រធានាធិបតីកូរ៉េខាងត្បូងព្យួរតំណែង លោក Yoon Suk Yeol ត្រូវបានតុលាការធម្មនុញ្ញសម្រេចដកតំណែងជាផ្លូវការហើយ នៅថ្ងៃសុក្រ ទី៤ ខែមេសា ជុំវិញការប្រកាសដាក់ឱ្យប្រើច្បាប់អាជ្ញាសឹក។ តាមរយៈ សាលក្រមសម្រេចរបស់តុលាការធម្មនុញ្ញកូរ៉េខាងត្បូង ដោយទទួលយកសេចក្ដីសម្រេចរបស់សភាដែលបានបោះឆ្នោតគាំទ្រការដកតំណែងរបស់លោក Yoon បានធ្វើឱ្យរូបលោកក្លាយជាប្រធានាធិបតីទី២របស់កូរ៉េខាងត្បូង ដែលត្រូវបានទម្លាក់ចេញពីតំណែង បន្ទាប់ពីលោកស្រី Park Geun-hye ដែលត្រូវបានតុលាការធម្មនុញ្ញទម្លាក់ចេញពីតំណែងនៅខែមីនា ឆ្នាំ២០១៧ ពីបទពុករលួយ និងរំលោភអំណាច។ ចៅក្រមទាំង៨រូបនៃតុលាការធម្មនុញ្ញ បានសម្រេចជាឯកច្ឆន្ទដើម្បីដកតំណែងលោក Yoon។

* តើនឹងមានអ្វីកើតឡើងបន្ទាប់?
ក្រោយលោក យូន ត្រូវបានដកចេញពីតំណែង នាយករដ្ឋមន្ត្រីកូរ៉េខាងត្បូង លោក Han Duck-soo នឹងបន្តកាន់តំណែងជាប្រធានាធិបតីស្ដីទី រហូតដល់ប្រធានាធិបតីថ្មីត្រូវបានជ្រើសរើសនៅក្នុងការបោះឆ្នោតសកលមុនអាណត្តិ។ ការបោះឆ្នោតជ្រើសរើសប្រធានាធិបតីថ្មីនឹងត្រូវធ្វើឡើងក្នុងពេល៦០ថ្ងៃ រាប់ចាប់ពីថ្ងៃសុក្រ ទី៤ ខែមេសាតទៅ ឬបានន័យថាការបោះឆ្នោតអាចនឹងប្រព្រឹត្តទៅនៅដើមខែមិថុនាខាងមុខ។ គណៈកម្មការជាតិរៀបចំការបោះឆ្នោត កូរ៉េខាងត្បូងត្រូវបានរំពឹងថានឹងប្រកាសពីការបរិច្ឆេទរៀបចំការបោះឆ្នោតនេះក្នុងពេលឆាប់ៗ។ ចំណែក គណបក្សនយោបាយទាំងអស់នឹងជ្រើសរើសបេក្ខជនប្រធានាធិបតីរបស់ខ្លួនតាមរយៈការបោះឆ្នោតបឋមក្នុងជួរផ្ទៃក្នុងបក្ស។ មកទល់នឹងពេលនេះ លោក Lee Jae-myung ជាមេដឹកនាំគណបក្សប្រជាធិបតេយ្យជាបក្សប្រឆាំងដ៏ធំបំផុតនៅកូរ៉េខាងត្បូង ត្រូវបានគេរំពឹងថានឹងក្លាយជាបេក្ខជននាំមុខគេ។ ប៉ុន្តែព្រមពេលជាមួយគ្នា លោក Lee កំពុងប្រឈមមុខ រឿងក្ដីក្តាំនៅតុលាការជាច្រើនករណី ហើយក្រុមរដ្ឋអាជ្ញាកូរ៉េខាងត្បូងទើបតែបានដាក់ពាក្យប្ដឹងឧទ្ធរណ៍ទៅកាន់តុលាការកំពូលដើម្បីប្រឆាំងនឹងសាលក្រមរបស់សាលាឧទ្ធរណ៍ដែលបានសម្រេចឱ្យមេបក្សប្រឆាំងរូបនេះរួចផុតពី ការចោទប្រកាន់ពាក់ព័ន្ធនឹងការបំពានច្បាប់បោះឆ្នោត។

លោក Lee ក៏កំពុងប្រឈមនឹងសវនាការមួយនៅក្នុងខែមេសានេះផងដែរ នោះគឺសំណុំរឿងដែលគេចោទប្រកាន់រូបលោកថាមានជាប់ពាក់ព័ន្ធនឹងបណ្ដាញផ្ដល់មូលនិធិទៅឱ្យកូរ៉េខាងជើង។ ប្រសិនបើត្រូវបានគេរកឃើញរូបលោក ពិតជាមានពិរុទ្ធភាពលើបទចោទណាមួយ ឬបទចោទទាំង២នេះតែម្ដង នោះលោក Lee អាចនឹងត្រូវបានហាមឃាត់មិនឱ្យឈរឈ្មោះបោះឆ្នោត។ តែគេមិនទាន់ដឹងច្បាប់នោះទេថាតើនឹងមានអ្វីកើតឡើង ប្រសិនបើលោក Lee ជាប់ឆ្នោតជាប្រធានាធិបតី មុនសវនាការទាំងនេះបិទបញ្ចប់ ខណៈរូបលោកបានច្រានចោលរាល់ការចោទប្រកាន់ប្រឆាំងនឹងរូបលោក។ រីឯខាងគណបក្សអំណាចប្រជាជនវិញ ដែលជាបក្សកាន់អំណាចរបស់លោក Yoon គេមិនទាន់ ដឹងថាតើនរណានឹងក្លាយជាបេក្ខជនប្រធានាធិបតីនោះទេ។ តែលោក Han Dong-hoon ដែលជាអតីតមេដឹកនាំបក្សកាន់អំណាច ចៅហ្វាយក្រុងសេអ៊ូល លោក Oh Se-hoon និងលោក Hong Joon-pyo ជាចៅហ្វាយក្រុង Daegu គឺសុទ្ធសឹងជាបេក្ខជនមានសក្តានុពល។

* លោក Yoon ប្រហែលជាមិនអាចនៅស្ងៀម
ក្រុមអ្នកវិភាគមួយចំនួនយល់ថានៅប៉ុន្មានសប្ដាហ៍ខាងមុខ លោក Yoon ប្រហែលជាអាចកៀរគរក្រុមអ្នកគាំទ្រនៅតាមដងផ្លូវ ខណៈព្យាយាមពង្រឹងអំណាចរបស់លោកនៅក្នុងគណបក្សអំណាចប្រជាជន (People Power Party) ជាទីដែលថ្នាក់ដឹកនាំក្នុងបក្សនេះនៅតែមានភក្តីភាពចំពោះរូបលោក។ ប្រឈមមុខនឹងសវនាការកាត់ទោសពីបទល្មើសព្រហ្មទណ្ឌនៃបទចោទបះបោរអំឡុងពេលប្រកាសប្រើច្បាប់អាជ្ញាសឹក ដែលជាទោសអាចឱ្យរូបលោកជាប់ ពន្ធនាគារអស់មួយជីវិត ឬក៏ត្រូវប្រហារជីវិត លោក Yoon មុខជានឹងចង់ឱ្យប្រធានាធិបតីថ្មីរបស់កូរ៉េខាងត្បូងគឺជាមនុស្សអភិរក្សនិយមមកពីគណបក្សរបស់លោក ដែលអាចនឹងលើកលែងទោសឱ្យរូបលោក ក្នុងករណីរូបលោក ត្រូវបានកាត់ទោសឱ្យជាប់ពិរុទ្ធ។ និយាយជារួម លោក Yoon ទំនងជាអាចនឹងប្រឹងប្រែងធ្វើយ៉ាងណាឱ្យមនុស្សដែលលោកគាំទ្រក្លាយជាបេក្ខជនប្រធានាធិបតីតំណាងឱ្យគណបក្សអំណាចប្រជាជន។

គួរបញ្ជាក់ថា លោក Yoon Suk Yeol ដែលត្រូវបានសភាគ្រប់គ្រងដោយក្រុមគណបក្សប្រឆាំង ព្យួរតំណែងកាលពីថ្ងៃទី១៤ ខែធ្នូ ជុំវិញការប្រកាសប្រើច្បាប់អាជ្ញាសឹកកាលពីថ្ងៃទី៣ ខែធ្នូ ឆ្នាំ២០២៤ ក៏កំពុងប្រឈមមុខនឹងបទចោទ ប្រកាន់ពីបទបះបោរផងដែរ។ ប្រសិនបើតុលាការរកឃើញថាលោកពិតជាមានពិរុទ្ធលើបទចោទបះបោរពិតមែន នោះលោកអាចប្រឈមមុខនឹងទោសជាប់ពន្ធនាគារអស់មួយជីវិត ឬប្រហារជីវិត។ តាមក្រុមអ្នកច្បាប់ ការសម្រេចចិត្ត របស់តុលាការធម្មនុញ្ញកូរ៉េខាងត្បូងដោយបណ្ដេញលោក Yoon ចេញពីតំណែង នឹងបង្កើនលទ្ធភាពដែលរូបលោកអាចនឹងត្រូវបានកាត់ទោសពីបទបះបោរ៕