(បាងកក)៖ អង្គការសហប្រជាជាតិ បានចោទប្រកាន់របបយោធាភូមាថា កំពុងរឹតត្បិតការដឹកជញ្ជូនជំនួយមនុស្សធម៌ ទៅកាន់តំបន់ដែលរងគ្រោះដោយការរញ្ជួយដីដ៏ខ្លាំង ដែលបានឆក់យកជីវិតមនុស្សជាង ៣,១០០នាក់។ ការចោទប្រកាន់នេះ កើតឡើងខណៈដែលមេដឹកនាំយោធា ដែលត្រូវបានពិភពលោកថ្កោលទោស លោក Min Aung Hlaing កំពុងតែធ្វើដំណើរទៅកាន់ទីក្រុងបាងកក ដើម្បីចូលរួមកិច្ចប្រជុំកំពូលក្នុងតំបន់ និងបានជួបពិភាក្សាជាមួយមេដឹកនាំឥណ្ឌា និងថៃ នៅថ្ងៃសុក្រនេះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters។

ដំណើរទស្សនកិច្ចក្រៅប្រទេសដ៏កម្ររបស់លោក Min Aung Hlaing ចាប់តាំងពីរដ្ឋប្រហារឆ្នាំ ២០២១ ដែលបានផ្តួលរំលំរដ្ឋាភិបាលជាប់ឆ្នោត និងបង្កឱ្យមានជម្លោះស៊ីវិលទូទាំងប្រទេស បានកើតឡើងចំពេលមានការរងគ្រោះដោយគ្រោះរញ្ជួយដី ដែលហាក់ដូចជាបានផ្តល់ឱកាសឱ្យរបបយោធាពង្រីកទំនាក់ទំនងការទូតរបស់ខ្លួន។ នៅខាងក្រៅកិច្ចប្រជុំកំពូល BIMSTEC លោក Min Aung Hlaing បានជួបពិភាក្សាទ្វេភាគីជាមួយនាយករដ្ឋមន្ត្រីថៃ លោកស្រី Paetongtarn Shinawatra និងនាយករដ្ឋមន្ត្រីឥណ្ឌា លោក Narendra Modi ដោយផ្តោតជាសំខាន់លើការស្តារឡើងវិញពីផលប៉ះពាល់នៃគ្រោះរញ្ជួយដី។

អ្នកនាំពាក្យក្រសួងការបរទេសឥណ្ឌាបានបញ្ជាក់ថា នៅក្នុងជំនួបជាមួយលោក Min Aung Hlaing លោក Modi បានអំពាវនាវឱ្យមានបទឈប់បាញ់ជាអចិន្ត្រៃយ៍នៅទូទាំងប្រទេសមីយ៉ាន់ម៉ា ដែលកំពុងរងគ្រោះដោយសង្គ្រាមស៊ីវិលដ៏រ៉ាំរ៉ៃ ដែលបានអូសបន្លាយអស់រយៈពេលជាងបីឆ្នាំមកហើយចាប់តាំងពីរដ្ឋប្រហារមក។

ទន្ទឹមនឹងកិច្ចខិតខំប្រឹងប្រែងផ្នែកការទូតទាំងនេះ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានចេញសេចក្តីថ្លែងការណ៍ ដោយចោទប្រកាន់របបយោធាមីយ៉ាន់ម៉ាថា កំពុងដាក់កំហិតយ៉ាងធ្ងន់ធ្ងរលើការដឹកជញ្ជូនជំនួយមនុស្សធម៌ទៅកាន់តំបន់ដែលរងការវាយប្រហារដោយគ្រោះរញ្ជួយដី ជាពិសេសនៅក្នុងតំបន់ដែលសហគមន៍មូលដ្ឋានមិនគាំទ្រការគ្រប់គ្រងរបស់យោធា។ អង្គការសហប្រជាជាតិក៏បាននិយាយផងដែរថា ខ្លួនកំពុងស៊ើបអង្កេតរបាយការណ៍ស្តីពីការវាយប្រហារចំនួន ៥៣ លើគូប្រជែងរបស់របបយោធា រួមទាំងការវាយប្រហារតាមអាកាស ដែលក្នុងនោះ ១៦ ករណីបានកើតឡើងបន្ទាប់ពីរបបយោធាបានប្រកាសបទឈប់បាញ់កាលពីថ្ងៃទី ២ ខែមេសា៕