(វ៉ាស៉ីនតោន)៖ ស្ថាប័នឧស្សាហកម្មភេសជ្ជៈ និងក្រុមអ្នកវិភាគបាននិយាយថា នៅសហរដ្ឋអាមេរិក អ្នកពេញនិយមផឹកស្រា អាចចំណាយលុយច្រើនជាងមុខ សម្រាប់ស្រាក្រឡុក ស្រាសំប៉ាញ និងស្រាបៀរបរទេស ខណៈម៉ាកយីហោមួយចំនួន ប្រហែលជាត្រូវបាត់ពីបញ្ជីកុម្ម៉ង់ក្នុងហាង រីឯការងារក៏នឹងត្រូវបាត់បង់ ដោយសារតែវិធានការពន្ធគយរបស់ លោក ត្រាំ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៤ ខែមេសា ឆ្នាំ ២០២៥។

ជុំថ្មីនៃវិធានការពន្ធជាសកលរបស់ លោក ត្រាំ បានវាយលុកលើទំនិញច្រើនប្រភេទ រាប់ចាប់តាំងពីស្រាក្រឡុកដ៏ពេញនិយម ដែលផ្សំពីស្រា Campari របស់អ៉ីតាលី រហូតដល់ស្រាបៀរ Guinness stout របស់ប្រទេសអៀរឡង់។

លោក ត្រាំ ក៏បានណែនាំឱ្យយកពន្ធ ២៥ភាគរយលើការនាំចូលស្រាបៀរទាំងអស់ ដោយបញ្ចូលពន្ធលើកំប៉ុងស្រាបៀរ ទៅនឹងពន្ធអាលុយមីញ៉ូមដែលមានស្រាប់ ដោយវាបានធ្វើឱ្យប៉ះពាល់ស្រាបៀរ Corona ដែលផលិតនៅម៉ិកស៉ិក និងស្រាបៀរ Heineken របស់ហូឡង់។ រីឯការគំរាមយកពន្ធ ២០០ភាគរយលើគ្រឿងស្រវឹងនាំចូលពីអឺរ៉ុប ក៏កំពុងក្នុងការជជែកនៅឡើយ។

ស្ថាប័នឧស្សាហកម្មភេសជ្ជៈ បានឱ្យដឹងថា ទំហំពន្ធដែលដាក់ចេញកាលពីថ្ងៃពុធ គឺខ្ពស់ល្មមនឹងប៉ះពាល់ដល់វិស័យ ដែលពឹងផ្អែកខ្លាំងពីការលក់ នៅក្នុងសហរដ្ឋអាមេរិក។ តាមស្ថាប័នពាណិជ្ជកម្មស្រាប្រភេទ Voka របស់អឺរ៉ុប គ្រាន់តែការនាំចេញពីអឺរ៉ុបទៅកាន់អាមេរិក គឺមានចំនួន ២.៩ពាន់លានអឺរ៉ូ ឬ ៣.១៨ពាន់លានដុល្លារក្នុងឆ្នាំ ២០២៤ ហើយការងារជាច្រើនដែលមានមូលដ្ឋាននៅអាមេរិក ក៏ពឹងផ្អែកលើពាណិជ្ជកម្មនេះផងដែរ។

អ្នកវិភាគនៅឯ UBS estimated ប៉ាន់ប្រមាណថា អ្នកផលិតស្រាដែលបានចុះបញ្ជីធំៗ នឹងត្រូវឡើងថ្លៃផលិតផលតម្លៃចន្លោះពី ២ភាគរយទៅ៥ភាគរយ ដើម្បីអាចរ៉ាប់រងបាននូវពន្ធគយ ឬស្រូបយកថ្លៃដើមមកវិញ និងទទួលបានលុយចំណេញពីការលក់។ ការ​លក់​ផលិតផល​ដូច​ជា​ស្រាក្រហម និង​ស្រា cognac ​​បាន​ធ្លាក់​ចុះ​រួច​ហើយ​នៅ​សហរដ្ឋ​អាមេរិក។ អ្នកផលិតស្រារបស់បារាំង និងអេស្បាញបានប្រាប់ Reuters ថា អ្នកពេញនិយមផឹកស្រានៅអាមេរិក នឹងត្រូវបង់ថ្លៃពន្ធមួយចំនួន៕