(បាងកក)៖ គ្រោះមហន្តរាយរញ្ជួយផែនដីដ៏ប្រល័យបំផុតមួយនៅក្នុងប្រទេសមីយ៉ាន់ម៉ា បានពង្រឹងគោលជំហររបស់មេដឹកនាំរបបសឹក លោក Min Aung Hlaing តាមរយៈការបើកចំហបណ្ដាញទំនាក់ទំនងការទូតដែលបានបិទ អស់រយៈពេលជាង៤ឆ្នាំមកនេះ បន្ទាប់ពីយោធាបានបណ្ដេញរដ្ឋាភិបាលស៊ីវិលជាប់ឆ្នោតចេញពីតំណែង ក្នុងរដ្ឋប្រហារយោធាមួយដែលបង្កឱ្យមានសង្រ្គាមស៊ីវិលមកទល់នឹងសព្វថ្ងៃ។ នៅមុនគ្រោះរញ្ជួយដីកម្រិតធ្ងន់ ៧.៧រ៉ិចទ័រ វាយប្រហារលើមីយ៉ាន់ម៉ាកាលពីសប្ដាហ៍មុន ដោយបានសម្លាប់មនុស្សលើស ៣០០០នាក់ លោក Min Aung Hlaing ត្រូវបានរាយការណ៍ថាបានត្រៀមលក្ខខណៈរួចជាស្រេចសម្រាប់ការបំពេញទស្សកិច្ចចូលរួមកិច្ចប្រជុំកំពូល ថ្នាក់តំបន់មួយក្នុងប្រទេសថៃ ខណៈក្រុមមន្ត្រីជំនិតរបស់លោកបានព្យាយាមរៀបចំជំនួបតាមទូរស័ព្ទជាមួយបណ្ដាមេដឹកនាំដទៃ។

ទូរទស្សន៍រដ្ឋមីយ៉ាន់ម៉ាបានផ្សាយថា លោក Min Aung Hlaing នឹងធ្វើដំណើរទៅដល់ប្រទេសថៃ នៅថ្ងៃព្រហស្បតិ៍ ទី៣ ខែមេសា មុននឹងចូលរួមកិច្ចប្រជុំកំពូល BIMSTEC ក្នុងទីក្រុងបាងកក នៅថ្ងៃសុក្រ ទី៤ ខែមេសា។ ដំណើរទស្សនកិច្ចនេះដែលកើតមានឡើងចំពេលបណ្ដាប្រទេសជាច្រើនកំពុងបង្ហាញក្ដីអាណិតអាសូរចំពោះមីយ៉ាន់ម៉ាដែលរងគ្រោះដោយសារគ្រោះរញ្ជួយដី គឺជាជំហានមួយដ៏មានសក្តានុពលមួយឆ្ពោះទៅរកការបិទបញ្ចប់ ភាពឯកោរបស់លោក Min Aung Hlaing ពីបណ្ដាមេដឹកនាំពិភពលោកភាគច្រើន ដោយសារសង្រ្គាមស៊ីវិលដែលបង្ខំឱ្យប្រជាជន ៣.៥លាននាក់ភៀសខ្លួនចេញពីផ្ទះសម្បែង និងបំផ្លាញសេដ្ឋកិច្ចជាតិ។ លោក Angshuman Choudhury ជាអ្នកវិភាគម្នាក់មានមូលដ្ឋានក្នុងប្រទេសសិង្ហបុរី បាននិយាយថា «របបសឹកមីយ៉ាន់ម៉ាបានដឹងយ៉ាងច្បាស់ថាមហាអំណាចក្នុងតំបន់​ដែលកំពុងប្រជែងដណ្ដើមឥទ្ធិពលគ្នានៅក្នុងប្រទេសមីយ៉ាន់ម៉ា ដូចជាឥណ្ឌា ចិន និងរុស្ស៉ី មុខជាចង់ប្រើឱកាសនេះដើម្បីពង្រឹងកន្លែងឈរជើងរបស់ពួកគេរៀងៗខ្លួននៅមីយ៉ាន់ម៉ា។ ដូច្នេះតាមរយៈការទំនាក់ទំនងជាសាធារណៈ និងដោយផ្ទាល់ជាមួយមេដឹកនាំដទៃទៀតក្នុងតំបន់ អាចជួយឱ្យរបបសឹកមីយ៉ាន់ម៉ា បង្ហាញឱ្យគេឯងបានឃើញថាខ្លួននៅតែជាតួអង្គដ៏សំខាន់មិនអាចខ្វះបាន និងជាអ្នកតំណាងតែមួយគត់របស់មីយ៉ាន់ម៉ា»។

ភ្លាមៗ ក្រោយគ្រោះរញ្ជួយដីកើតឡើង លោក Min Aung Hlaing បានបើកកិច្ចពិភាក្សាតាមទូរស័ព្ទជាមួយប្រធានាធិបតីចិន លោក ស៊ី ជីនពីង នាយករដ្ឋមន្ត្រីឥណ្ឌា លោក ណារិនដ្រា ម៉ូឌី និងនាយករដ្ឋមន្ត្រីម៉ាឡេស៊ី លោក អាន់វ៉ា អ៉ីប្រាហ៊ីម។ កិច្ចសន្ទនាទាំងនេះហើយបាននាំទៅរកការសន្យាផ្ដល់ជំនួយអន្តរជាតិជាបន្តបន្ទាប់។ ប៉ុន្មានសប្ដាហ៍ក្រោយរបបសឹកមីយ៉ាន់ម៉ាប្រកាសឡើងវិញពីផែនការរៀបចំការបោះឆ្នោតសកលនៅខែធ្នូ ឆ្នាំ២០២៥ គ្រោះរញ្ជួយដី ដ៏ប្រល័យមួយមិនធ្លាប់មាននៅមីយ៉ាន់ម៉ា ក្នុងពេលជាង១ស.វមកនេះ បានបើកឱកាសថ្មីមួយសម្រាប់មេដឹកនាំរបបសឹកដើម្បីទំនាក់ទំនងជាមួយមហាអំណាចក្នុងតំបន់។ ចាប់តាំងពីមានគ្រោះរញ្ជួយដីមក ជំនួយរាប់លានដុល្លារ និងបុគ្គលិកជួយសង្រ្គោះរាប់រយនាក់ប្រទេសជាច្រើនដូចជា ចិន ឥណ្ឌា រុស្ស៉ី និងអាស៊ីអាគ្នេយ៍ ត្រូវបានបញ្ជូនទៅកាន់មីយ៉ាន់ម៉ា។ លោក Choudhury យល់ថារបបសឹកមីយ៉ាន់ម៉ាអាចនឹងកេងយកចំណេញពីគ្រោះមហន្តរាយ ដើម្បីពង្រឹងគោលជំហររបស់ខ្លួននៅលើសមរភូមិ។ «គ្រោះរញ្ជួយដីនេះនឹងបង្កភាពស្មុគស្មាញដល់ការប្រយុទ្ធរបស់ក្រុមឧទ្ទាម និងសមត្ថភាពរបស់ពួកគេក្នុងការរក្សាការគាំទ្រពីប្រជាជននៅក្នុងតំបន់»។ នេះជាការបន្ថែមរបស់ លោក Choudhury។

លោក Sihasak Phuangketkeow វិញជាអតីតអនុរដ្ឋមន្ត្រីថៃសម្រាប់កិច្ចការការបរទេស និងដែលបានធ្វើទស្សនកិច្ចទៅកាន់មីយ៉ាន់ម៉ាកាលពីខែមីនា បាននិយាយថាថ្នាក់ដឹកនាំមានគោលជំហរតឹងរ៉ឹងមួយចំនួននៃរបបសឹកជឿថា របបរបស់ពួកគេនៅតែអាចបន្តឈរជើងដោយទទួលបានការគាំទ្រពីសម្ព័ន្ធមិត្តរបស់ខ្លួនមួយចំនួន។ លោក Sihasak បានប្រាប់ Reuters​ ថា«ពួកគេមើលឃើញថាសណ្ដាប់ធ្នាប់ពិភពលោកកំពុងផ្លាស់ប្ដូរ ហើយមានប៉ូលថ្មីមួយ អាចឱ្យពួកគេរួមរស់ជាមួយចិន រុស្ស៉ី និងឥណ្ឌា»។ ក្នុងន័យនេះគឺពួកគេយល់ថាមីយ៉ាន់ម៉ាអាចមានសមត្ថភាពអភិវឌ្ឍប្រទេសដោយមិនចាំបាច់មានការចូលរួមជាមួយប្រទេសមួយចំនួនផ្សេងទៀត។ ម្យ៉ាងវិញទៀត នៅឯកិច្ចប្រជុំ BIMSTEC លោក Min Aung Hlaing នឹងទទួលបានឱកាសផ្នែកការទូតបន្ថែម ក្នុងនោះរួមមានការទំនាក់ទំនងបន្ថែមជាមួយឥណ្ឌា និងថៃ។ BIMSTEC មានប្រទេសជាសមាជិកដូចជាថៃ មីយ៉ាន់ម៉ា ឥណ្ឌា បង់ក្លាដែស នេប៉ាល់ ស្រីលង្កា និងប៊ូតង់។ តាមលោក Sihasak លោក Min Aung Hlaing ក៏មិនចង់ពឹងផ្អែកទាំងស្រុងជ្រុលពេកលើចិនតែមួយគត់នោះដែរ។ នៅទីក្រុងបាងកក ប្រមុខរបបសឹករូបនេះអាចនឹងជួបជាមួយលោក ម៉ូឌី ដែលបានប្រញាប់ ប្រញាល់បញ្ជូនជំនួយ និងបុគ្គលិកជួយសង្រ្គោះទៅកាន់មីយ៉ាន់ម៉ា ក្រោយគ្រោះរញ្ជួយដីកើតឡើង។ នេះបើតាមប្រភពចំនួន៣ក្នុងលក្ខខណ្ឌមិនបញ្ចេញឈ្មោះបានប្រាប់ Reuters។

លោក Choudhury ដោយសំអាងលើកិច្ចសន្ទនាតាមទូរស័ព្ទរវាងលោក ម៉ូឌី និងលោក Min Aung Hlaing បានបន្ថែមថា «លោក ម៉ូឌីបានបង្ហាញរួចហើយថាលោកមានបំណងទំនាក់ទំនងគ្នាដោយផ្ទាល់»។ ដំណើរទស្សនកិច្ច នៅទីក្រុងបាងកក ក៏អាចនឹងផ្ដល់ឱ្យលោក Min Aung Hlaing ផងដែរនូវឱកាសដើម្បីជួបលោក Thaksin Shinawatra ជាអតីតនាយករដ្ឋមន្ត្រីថៃ និងដែលសព្វថ្ងៃជាទីប្រឹក្សាផ្ទាល់ខ្លួនរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៉ីប្រាហ៊ីមដែលជាប្រធានប្ដូរវេនអាស៊ាន។

គួរបញ្ជាក់ថា ក្រុមអ្នកវិភាគមួយចំនួនបាននិយាយថា ថៃកំពុងដើរតាមជំហានមួយយ៉ាងប្រុងប្រយ័ត្ន ពាក់ព័ន្ធនឹងការផ្ដល់ភាពស្របច្បាប់ ឬការទទួលស្គាល់ជាផ្លូវការទៅឱ្យលោក Min Aung Hlaing ស្របពេលសង្រ្គាមស៊ីវិលជាមួយ ក្រុមឧទ្ទាមបាន និងកំពុងកាត់បន្ថយអំណាចរបស់លោក នៅមីយ៉ាន់ម៉ា។ លោក Thitinan Pongsudhirak ជាអ្នកវិទ្យាសាស្ត្រនយោបាយម្នាក់មកពីសាកលវិទ្យាល័យ Chulalongkorn បាននិយាយថា «សង្រ្គាមស៊ីវិលនៅមីយ៉ាន់ម៉ា ជាសង្រ្គាមដ៏អាក្រក់ ឃោរឃៅ និងដ៏ហិង្សា។ ម្លោះហើយថៃត្រូវតែប្រុងប្រយ័ត្នជាប់ជានិច្ច ដោយសារតែមានព្រំដែនដ៏វែងជាប់ជាមួយមីយ៉ាន់ម៉ា និងមានរបស់ជាច្រើនប្រថុយនឹងការខាតបង់»៕