(រ៉ាហ្វា)៖ រលកជនភៀសខ្លួនរាប់សែននាក់បានបន្តសម្រុកស្វែងរកទីជម្រកសុវត្ថិភាពកាលពីថ្ងៃព្រហស្បតិ៍ ខណៈកងកម្លាំងអ៊ីស្រាអែលបានបន្តរុលចូលកាន់តែជ្រៅទៅក្នុងទីក្រុង Rafah ដែលជាទីក្រុងចុងក្រោយនៅភាគខាងត្បូងតំបន់ហ្គាហ្សា ដែលនៅសេសសល់មិនទាន់ត្រូវបានគ្រប់គ្រងពេញលេញដោយអ៊ីស្រាអែល។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters កាលពីថ្ងៃព្រហស្បតិ៍ ទី៣ ខែមេសា ឆ្នាំ ២០២៥។

ប្រតិបត្តិការយោធាថ្មីនេះ បានបង្ខំឱ្យប្រជាជនស៊ីវិលជាច្រើននាក់ត្រូវចាកចោលផ្ទះសម្បែងរបស់ពួកគេ ដែលជាការផ្លាស់ទីលំនៅទ្រង់ទ្រាយធំបំផុតមួយចាប់តាំងពីសង្រ្គាមបានផ្ទុះឡើង។

បន្ទាប់ពីបានប្រកាសពីចេតនាកាលពីម្សិលមិញ កងកម្លាំងអ៊ីស្រាអែលបានសម្រុកចូលទៅក្នុងទីក្រុង Rafah ដែលជាទីក្រុងមួយស្ថិតនៅគែមព្រំដែនភាគខាងត្បូងនៃតំបន់ហ្គាហ្សា ហើយធ្លាប់ជាកន្លែងជ្រកកោនចុងក្រោយសម្រាប់ប្រជាជនដែលបានភៀសខ្លួនចេញពីតំបន់ផ្សេងៗទៀតក្នុងអំឡុងពេលសង្រ្គាម។ ឥឡូវនេះ ពួកគេត្រូវប្រឈមមុខនឹងការផ្លាស់ទីលំនៅជាថ្មីម្តងទៀត។

ក្រសួងសុខាភិបាលនៃតំបន់ហ្គាហ្សាបានរាយការណ៍ថា យ៉ាងហោចណាស់មានមនុស្ស ៩៧ នាក់បានបាត់បង់ជីវិតនៅក្នុងការវាយប្រហាររបស់អ៊ីស្រាអែលក្នុងរយៈពេល ២៤ ម៉ោងចុងក្រោយនេះ ដែលក្នុងនោះមានមនុស្សយ៉ាងហោចណាស់ ២០ នាក់បានស្លាប់នៅក្នុងការវាយប្រហារតាមផ្លូវអាកាសនៅព្រឹកព្រលឹមនៅសង្កាត់ Shejaia នៃទីក្រុងហ្គាហ្សា។

អ្នកស្រុកជាច្រើនបានរៀបរាប់ពីស្ថានភាពដ៏អាក្រក់នៅក្នុងទីក្រុង Rafah។ បុរសម្នាក់ជាឪពុកកូន ៧ នាក់ ដែលបានភៀសខ្លួនពី Rafah ទៅកាន់ទីក្រុង Khan Younis ដែលនៅក្បែរនោះ បានប្រាប់ Reuters តាមរយៈកម្មវិធីជជែកថា «Rafah ស្ទើរតែលែងមានទៀតហើយ វាហៀបនឹងរលាយបាត់»។ បុរសម្នាក់ទៀតដែលសុំមិនបញ្ចេញឈ្មោះបាននិយាយទាំងក្តីអស់សង្ឃឹមថា «ពួកគេកំពុងបំផ្លាញផ្ទះសម្បែង និងទ្រព្យសម្បត្តិដែលនៅសេសសល់របស់យើង»។

គួរបញ្ជាក់ថា ប្រតិបត្តិការយោធាដើម្បីគ្រប់គ្រងទីក្រុង Rafah គឺជាការកើនឡើងមួយកម្រិតទៀតនៅក្នុងសង្រ្គាម ដែលអ៊ីស្រាអែលបានចាប់ផ្តើមឡើងវិញកាលពីខែមុន បន្ទាប់ពីបានបោះបង់ចោលបទឈប់បាញ់ដែលបានអនុវត្តអស់រយៈពេលជាច្រើនសប្តាហ៍ ចាប់តាំងពីខែមករាមក៕