(វ៉ាស៊ីនតោន)៖ សារព័ត៌មាន CNN បានរាយការណ៍នៅល្ងាចថ្ងៃចន្ទ ទី៣១ ខែតុលានេះថា ការស្ទង់មតិ ថ្នាក់ជាតិថ្មីមួយបានបង្ហាញថា បេក្ខភាពប្រធានាធិបតីនៃគណបក្សប្រជាធិបតេយ្យលោកស្រី ហ៊ីលឡារី គ្លីនតុន បាននំាមុខបន្តិចបន្ដួចប៉ុណ្ណោះ លើគូប្រជែងរបស់លោកស្រី មកពីគណបក្សសាធារណៈរដ្ឋលោក ដូណាល់ ត្រាំ ក្នុងសំឡេង ៤៦ភាគរយទល់នឹង ៤៥ភាគរយ។ នេះបើយោងតាម​ការស្ទង់មតិ ចេញផ្សាយដោយសារព័ត៌មាន ABC News និង Washington Post។

យោងតាមការស្ទង់មតិថ្នាក់ជាតិកាលពីលើកមុនចេញផ្សាយដោយ CNN លោកស្រី គ្លីនតុន បាននំាមុខ   លោក ត្រាំ ដល់ទៅ៥ពិន្ទុ​ (៤៧ភាគរយទល់នឹង ៤២​ភាគរយ) ក៏ប៉ុន្តែដោយសារតែរឿងអាស្រូវ Email ប្រជាប្រិយភាពរបស់លោកស្រី គ្លីនតុន បានធ្លាក់ចុះគួរឱ្យកត់សម្គាល់ ខណៈការបោះឆ្នោតកាន់ជិតចូលមក ដល់​។ ប៉ុន្តែទោះជាបីយ៉ាងនេះក្ដីបើតាមការស្ទង់មតិរបស់ ABC និង Washington Post អ្នកបោះឆ្នោត៦នាក់ ក្នុងចំណោម១០ នាក់បាននិយាយថាព័ត៌មានដែល FBI​​ បើកការស៊ើបអង្កេតសាជាថ្មីជុំវិញរឿងអាស្រូវ Email​ លោកស្រី គ្លីនតុន នឹងមិនធ្វើឱ្យមានការផ្លាស់ប្តូរការបោះឆ្នោតរបស់ពួកគេឡើយ រីឯមនុស្ស៣នាក់ ក្នុងចំណោម ១០នាក់បាននិយាយថាពួកគេដូចជាស្ទាក់ស្ទើរ ក្នុងការគំាទ្រលោកស្រី គ្លីនតុន។

គួររំលឹកថាការស្ទង់មតិនៅថ្ងៃអាទិត្យ (ពេលវេលានៅវ៉ាស៊ីនតោន) ក៏បានធ្វើឡើងផងដែរនៅរដ្ឋ North Carolina ដោយ NBC, Wall Street Journal, និង Marist University ដែលបានបង្ហាញថា​លោកស្រី គ្លីនតុន នំាមុខលោក ត្រាំ ៤៧ ភាគរយទល់នឹង ៤១ភាគរយ ស្របពេលនៅក្នុងរដ្ឋ Florida លោក ត្រាំ ទទួលបានសំឡេង ៤៤ភាគរយ និង ៤៥ភាគរយ សម្រាប់លោកស្រី គ្លីនតុន។

ប៉ុន្តែព្រមពេលជាមួយគ្នានេះដែរកាសែត New York Times បានចេញផ្សាយថា លោក ត្រាំ បាននាំមុខ លោកស្រី គ្លីនតុន ៤៦ភាគរយទល់នឹង៤២ភាគរយនៅក្នុងរដ្ឋ Florida ដែលតួលេខនានា​ខាងលើនេះ វាបានបង្ហាញកាន់តែច្បាស់ថា ម្ចាស់ឆ្នោតនានានៅអាមេរិកចាប់ផ្តើមមានមន្ទិល ចំពោះបេក្ខជនដែលពួកគេ ធ្លាប់គាំទ្រកន្លងមក ហើយខ្លះទៀតបានសម្រេចប្តូរចិត្តទៅគាំទ្រលោក ដូណាល់ ត្រាំ វិញ៕