(វ៉ាស៉ីតោន)៖ សហរដ្ឋអាមេរិក បានហាមប្រាមបុគ្គលិករដ្ឋាភិបាល ដែលកំពុងធ្វើការនៅក្នុងប្រទេសចិន កុំឱ្យមានទំនាក់ទំនងស្នេហាជាមួយពលរដ្ឋចិន ដោយសារព័ត៌មាន AP បានរាយការណ៍នាថ្ងៃព្រហស្បតិ៍ ទី៣ ខែមេសា ដោយដកស្រង់ប្រភពពីមនុស្សចំនួន​ ៤នាក់ ​ដែល​ដឹង​​អំពី​បញ្ហា​នេះតែសុំមិនបញ្ជាក់​អត្តសញ្ញាណ​។

គោលការណ៍នេះ ត្រូវបានដាក់ឱ្យចូលជាធរមាន ដោយឯកអគ្គរដ្ឋទូតអាមេរិកប្រចាំប្រទេសចិន លោក Nicholas Burns កាលខែមករា និងមិនយូរប៉ុន្មានមុនពេលលោកចាកចេញពីប្រទេសចិន ហើយក៏អនុវត្តផងដែរចំពោះសមាជិកគ្រួសារ និងបុគ្គលិកកិច្ចសន្យា។ គោលការណ៍នេះ គ្របដណ្តប់លើបេសកកម្មរបស់សហរដ្ឋអាមេរិកក្នុងប្រទេសចិន រួមទាំងស្ថានទូតនៅទីក្រុងប៉េកាំង ស្ថានកុងស៊ុលនៅទីក្រុង Guangzhou, Shanghai, Shenyang, Wuhan និងហុងកុង។ ប៉ុន្តែមិនអនុវត្តចំពោះបុគ្គលិកអាមេរិក ដែលឈរជើងនៅខាងក្រៅប្រទេសចិននោះទេ។

គួរបញ្ជាក់ថា ក្រសួងការបរទេសចិន និងស្ថានទូតអាមេរិកប្រចាំប្រទេសចិន មិនទាន់ឆ្លើយតបចំពោះ សំណើសុំការអត្ថាធិប្បាយនៅឡើយទេ។ ប្រសិនបើជាការពិត វានឹងក្លាយជាភាពតានតឹងថ្មីទៀត រវាងទីក្រុងប៉េកាំង និងទីក្រុងវ៉ាស៉ីនតោន បន្ថែមពីលើជម្លោះពាណិជ្ជកម្មដែលស្រាប់៕