(ប៊ុយដាប៉ែស)៖ នាយករដ្ឋមន្ត្រីអ៉ីស្រាអែល លោក Benjamin Netanyahu បានធ្វើដំណើរទៅដល់រដ្ឋធានីប៊ុយដាប៉ែស ប្រទេសហុងគ្រីហើយនៅព្រឹកថ្ងៃព្រហស្បតិ៍ ទី៣ ខែមេសា ដែលនេះ ជាដំណើរទស្សនកិច្ចដំបូងបំផុតរបស់លោកទៅកាន់តំបន់អឺរ៉ុប ចាប់តាំងពីឆ្នាំ២០២៣ ដោយមិនខ្វល់ឡើយពីដីកាចាប់ខ្លួនរបស់តុលាការព្រហ្មទណ្ឌអន្តរជាតិ ICC ប្រឆាំងនឹងរូបលោក។ នេះ បើតាមការចេញផ្សាយដោយទីភ្នាក់ងារសារព័ត៌មាន AFP។

នាយករដ្ឋមន្ត្រីហុងគ្រី លោក Viktor Orban បានអញ្ជើញលោក Netanyahu បំពេញទស្សនកិច្ចទៅកាន់ប្រទេសរបស់លោក កាលពីខែវិច្ឆិកា ឆ្នាំ២០២៤ ពោលគឺមួយថ្ងៃបន្ទាប់ពី ICC ចេញ ដីកាចាប់ខ្លួនប្រឆាំងនឹងរូបលោកជុំវិញការចោទប្រកាន់ពីការប្រព្រឹត្តបទឧក្រិដ្ឋសង្រ្គាមនៅក្នុងតំបន់ហ្កាហ្សា។ លោក Orban បានសន្យាថាហុងគ្រីដែលជាសមាជិកសហភាពអឺរ៉ុប និងជាសមាជិក ICC ផងដែរនោះ នឹងមិនអនុវត្តតាមដីកាចាប់ខ្លួននេះទេ ដោយនិយាយថាការសម្រេចចិត្តរបស់តុលាការអន្តរជាតិមួយនេះគឺជាការលូកលាន់នៅក្នុងជម្លោះមួយដែលកំពុង កើតឡើង ក្រោមបុព្វហេតុនយោបាយ។

នៅក្នុងសារបង្ហោះមួយលើ Facebook រដ្ឋមន្ត្រីការពារជាតិហុងគ្រី លោក Kristof Szalay-Bobrovniczky បានសរសេរថា «ស្វាគមន៍ការធ្វើដំណើរមកកាន់ប៊ុយដាប៉ែស Benjamin Netanyahu!» ខណៈនាយករដ្ឋមន្ត្រីអ៉ីស្រាអែលរូបនេះផ្ដើមបំពេញទស្សនកិច្ច។

គួរបញ្ជាក់ថា ហុងគ្រី បានចុះហត្ថលេខាលើលក្ខខន្តិកៈទីក្រុងរ៉ូម ដែលជាសន្ធិសញ្ញាអន្តរជាតិមួយបង្កើត ICC ក្នុងឆ្នាំ១៩៩៩ និងបានផ្ដល់សច្ចារប័នលើសន្ធិសញ្ញានេះនៅ២ឆ្នាំក្រោយមក ទៀត អំឡុងអាណត្តិទី១ របស់លោក Orban។ ICC ដែលត្រូវបានបង្កើតឡើងជាផ្លូវការក្នុងឆ្នាំ២០០២ មិនមានប៉ូលិសផ្ទាល់ខ្លួននោះទេ ដូច្នេះត្រូវពឹងផ្អែកលើកិច្ចសហប្រតិបត្តិការជាមួយ ប្រទេសជាសមាជិករបស់ខ្លួនទាំង១២៥ ដើម្បីអនុវត្តដីកាចាប់ខ្លួនណាមួយ៕