(ប៉ារីស)៖ រដ្ឋមន្ត្រីការបរទេសបារាំង បានព្រមានកាលពីថ្ងៃពុធ ទី២ ខែមេសា ថាប្រសិនបើមហាអំណាចពិភពលោកមិនអាចឈានដល់កិច្ចព្រមព្រៀងថ្មីមួយជាមួយអ៉ីរ៉ង់ ក្នុងពេលឆាប់ៗ ពាក់ព័ន្ធនឹងកម្មវិធីនុយក្លេអ៊ែររបស់តេហេរ៉ង់ទេ នោះការប្រឈមមុខដាក់គ្នាដោយយោធាប្រហែលជាចៀសមិនរួចឡើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងនៅបន្ទាប់ពីប្រធានាធិបតីបារាំង លោក Emmanuel Macron បានកោះកិច្ចប្រជុំដ៏កម្រមួយជាមួយក្រុមរដ្ឋមន្ត្រីសំខាន់ៗរបស់បារាំង និងក្រុមអ្នកជំនាញ កាលពីថ្ងៃពុធ ដើម្បីពិភាក្សាពី សំណុំរឿងអ៉ីរ៉ង់ ប្រមុខការទូតបារាំង លោក Jean-Noel Barrot ហាក់ដូចជាបានបង្កើនការដាក់សម្ពាធលើអ៉ីរ៉ង់។ លោក Barrot បានគូសបញ្ជាក់ប្រាប់សមាជិកសភាបារាំង ដូច្នេះថា «ឱកាស កាន់តែរួមតូច។ យើងនៅសល់ពេលត្រឹមតែប៉ុន្មានខែទៀតប៉ុណ្ណោះ រហូតដល់កិច្ចព្រមព្រៀងឆ្នាំ២០១៥ស្ដីពីកម្មវិធីនុយក្លេអ៊ែរអ៉ីរ៉ង់ជាមួយមហាអំណាចអស់សុពលភាព ហើយបើបរាជ័យ នោះការប្រឈមមុខដាក់គ្នាដោយយោធាប្រហែលជាចៀសមិនរួចនោះទេ»។

គួរបញ្ជាក់ថា ប្រធានាធិបតីអាមេរិក លោក ដូណាល់ ត្រាំ កាលពីអាទិត្យសប្ដាហ៍មុន បានព្រមានអ៉ីរ៉ង់ថានឹងត្រូវប្រឈមមុខនឹងការទម្លាក់គ្រាប់បែក ឬក៏ទណ្ឌកម្មបន្ទាប់បន្សំ ប្រសិនបើមិនព្រម ចុះកិច្ចព្រមព្រៀងជាមួយអាមេរិកទេនោះ។ ប៉ុន្តែ មេដឹកនាំអ៉ីរ៉ង់បានគំរាមវិញដែរថាអ៉ីរ៉ង់នឹងចាត់វិធានការវាយបកវិញដាច់ខាត ប្រសិនបើអ៉ីរ៉ង់រងការវាយប្រហារណាមួយពីសំណាក់សត្រូវ៕