(វ៉ាស៉ីនតោន)៖ កាលពីថ្ងៃអង្គារសប្តាហ៍នេះ សហរដ្ឋអាមេរិក បានអនុម័តការលក់យន្តហោះចម្បាំង F-16 ក្នុងទំហំទឹកប្រាក់ ៥.៥៨ពាន់លានដុល្លារទៅឱ្យប្រទេសហ្វីលីពីន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី២ ខែមេសា ឆ្នាំ ២០២៥។

ក្រសួងការបរទេសអាមេរិក បានឱ្យដឹងថា នេះជាការបើកភ្លើងបៃតងឱ្យលក់យន្តហោះចម្បាំង F-16 ចំនួន ២០គ្រឿង និងឧបករណ៍ពាក់ព័ន្ធផ្សេងទៀត ទៅឱ្យហ្វីលីពីន ដែលជាសម្ព័ន្ធមិត្តមានសន្ធិសញ្ញារបស់សហរដ្ឋអាមេរិក។ ក្រសួងបានបញ្ជាក់ក្នុងសេចក្តីថ្លែងការណ៍ដូច្នេះថា «ការលក់នេះ នឹងជួយជំរុញសមត្ថភាពកងទ័ពអាកាសហ្វីលីពីន ក្នុងពេលធ្វើប្រតបត្តិការការពារដែនសមុទ្រ ក៏ដូចជាពង្រឹងការបង្ក្រាបសត្រូវ ក្នុងកិច្ចការការពារដែនអាកាស»។

គួរបញ្ជាក់ថា ចូលមកដល់អាណត្តិរបស់លោកប្រធានាធិបតី ដូណាល់ ត្រាំ រដ្ឋបាលអាមេរិកបានព្យាយាមបង្វែរ កិច្ចខិតខំប្រឹងប្រែងផ្នែកយោធារបស់សហរដ្ឋអាមេរិកទៅកាន់តំបន់អាស៉ី ដើម្បីប្រឈមមុខនឹងការកើនឡើងនូវឥទ្ធពលចិន និងជាពិសេសនៅពេលដែលភាពតានតឹង លើកោះតៃវ៉ាន់កំពុងកើនឡើង៕