(វ៉ាស៊ីនតោន)៖ វិធានការរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ក្នុងការដាក់ពន្ធចំនួន ២៥% លើការនាំចូលរថយន្ត និងរថយន្តដឹកទំនិញខ្នាតតូច បានបង្កឱ្យមានរលកនៃការព្រួយបារម្ភ និងការត្រៀមខ្លួនឆ្លើយតបទូទាំងពិភពលោក។ បណ្តាប្រទេស និងអង្គការសេដ្ឋកិច្ចធំៗ ដែលសេដ្ឋកិច្ចរបស់ពួកគេពឹងផ្អែកយ៉ាងខ្លាំងលើការនាំចេញរថយន្តទៅកាន់ទីផ្សារអាមេរិក បានចេញប្រតិកម្មយ៉ាងខ្លាំងចំពោះវិធានការគំរាមកំហែងនេះ។
សហភាពអឺរ៉ុប (EU) បានសម្តែងការខកចិត្តយ៉ាងខ្លាំងចំពោះសេចក្តីប្រកាសនេះ ដោយប្រធានគណៈកម្មការ លោកស្រី អ៊ុរសូឡា វ៉ន ដឺ ឡេយ៉ិន បានសង្កត់ធ្ងន់ថា សហភាពអឺរ៉ុបកំពុងពិចារណាលើគ្រប់ជម្រើសទាំងអស់ ដើម្បីការពារផលប្រយោជន៍សេដ្ឋកិច្ចរបស់ខ្លួន។ មិនខុសគ្នានោះទេ ប្រទេសកាណាដាបានចាត់ទុកចំណាត់ការនេះថាជា «ការវាយប្រហារដោយផ្ទាល់» លើសេដ្ឋកិច្ចរបស់ខ្លួន ប៉ុន្តែបានប្តេជ្ញាថានឹងរួបរួមគ្នាដើម្បីជំនះឧបសគ្គនេះ។ ចំណែកប្រទេសប្រេស៊ីលវិញ ក៏បានសម្តែងការព្រួយបារម្ភយ៉ាងខ្លាំងផងដែរ ដោយចាត់ទុកទង្វើនេះថាជាការរំលោភលើគោលការណ៍នៃពាណិជ្ជកម្មសេរី។
រដ្ឋាភិបាលជប៉ុនក៏បានចេញប្រតិកម្មយ៉ាងខ្លាំង ដោយបញ្ជាក់ពីការព្រួយបារម្ភយ៉ាងជ្រាលជ្រៅចំពោះគោលជំហររបស់សហរដ្ឋអាមេរិក និងកំពុងសិក្សាលើវិធានការដែលអាចធ្វើបាន ដើម្បីឆ្លើយតបឱ្យមានប្រសិទ្ធភាព។ នៅអាស៊ីបូព៌ាវិញ កូរ៉េខាងត្បូងដែលជាមជ្ឈមណ្ឌលផលិតរថយន្តដ៏សំខាន់ ក៏បានកោះប្រជុំបន្ទាន់ជាមួយក្រុមហ៊ុនផលិតរថយន្តធំៗ ដើម្បីពិភាក្សាអំពីផលប៉ះពាល់ និងរៀបចំយុទ្ធសាស្ត្រឆ្លើយតប ទោះបីជាពួកគេអាចនឹងងាកទៅរកការពង្រីកផលិតកម្មក្នុងស្រុកនៅសហរដ្ឋអាមេរិក ជាយុទ្ធសាស្ត្រកាត់បន្ថយផលប៉ះពាល់ក៏ដោយ។
ក្រៅពីបណ្តាប្រទេសដែលបានរៀបរាប់ខាងលើ ប្រទេសជាច្រើនផ្សេងទៀតដែលសេដ្ឋកិច្ចរបស់ពួកគេមានទំនាក់ទំនងយ៉ាងជិតស្និទ្ធជាមួយការនាំចេញរថយន្តទៅកាន់សហរដ្ឋអាមេរិក ក៏ត្រូវបានគេរំពឹងថានឹងកំពុងរៀបចំផែនការសងសឹកផងដែរ។ វិធានការទាំងនេះអាចរួមបញ្ចូលទាំងការដាក់ពន្ធលើទំនិញនាំចូលពីសហរដ្ឋអាមេរិក ឬការដាក់បណ្តឹងទៅអង្គការពាណិជ្ជកម្មពិភពលោក (WTO)។ អ្នកវិភាគបានព្រមានថា ការដាក់ពន្ធនេះអាចបង្កឱ្យមានជម្លោះពាណិជ្ជកម្មអន្តរជាតិកាន់តែធ្ងន់ធ្ងរ ដែលនឹងប៉ះពាល់ដល់កំណើនសេដ្ឋកិច្ចជាសកល ខណៈដែលប្រទេសនានាកំពុងស្វែងរកមធ្យោបាយដើម្បីការពារផលប្រយោជន៍សេដ្ឋកិច្ចជាតិរបស់ពួកគេ។
គួរបញ្ជាក់ថា ពន្ធថ្មីលើរថយន្ត និងរថយន្តដឹកទំនិញធុនស្រាលរបស់លោក ដូណាល់ ត្រាំនឹងចាប់ផ្តើមអនុវត្តនៅថ្ងៃទី ៣ ខែមេសា។ ការអនុវត្តនេះនឹងធ្វើឡើងមួយថ្ងៃបន្ទាប់ពីលោក គ្រោងប្រកាសពន្ធ «ទៅវិញទៅមក» ដែលសំដៅលើប្រទេសដែលលោកចោទថាជាអ្នកបង្កឱនភាពពាណិជ្ជកម្មរបស់អាមេរិក។ កាលពីឆ្នាំ ២០២៤ សហរដ្ឋអាមេរិកបាននាំចូលផលិតផលរថយន្តតម្លៃ ៤៧៤ ពាន់លានដុល្លារ ដោយមានប្រទេសម៉ិកស៊ិក ជប៉ុន កូរ៉េខាងត្បូង កាណាដា និងអាល្លឺម៉ង់ ដែលជាសម្ព័ន្ធមិត្តជិតស្និទ្ធ ជាអ្នកផ្គត់ផ្គង់ធំជាងគេ៕
