(ឌូបៃ)៖ ប្រភពយោធាបានរាយការណ៍នៅថ្ងៃពុធថា កងទ័ពស៊ូដង់កំពុងឡោមព័ទ្ធអាកាសយានដ្ឋាន Khartoum និងតំបន់ជុំវិញនោះ ដែលជាចំណុចយុទ្ធសាស្ត្រដ៏សំខាន់ ខណៈដែលជម្លោះរយៈពេលពីរឆ្នាំ ជាមួយកងកម្លាំងគាំទ្ររហ័ស (RSF) ឈានចូលដំណាក់កាលដ៏គ្រោះថ្នាក់មួយទៀត។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ការវិវត្តន៍នេះកើតឡើង បន្ទាប់ពីកងទ័ពបានដណ្តើមកាន់កាប់វិមានប្រធានាធិបតីនៅកណ្តាលទីក្រុង Khartoum កាលពីថ្ងៃសុក្រ ដែលជាជ័យជម្នះដ៏សំខាន់មួយក្នុងសង្គ្រាមដែលគំរាមកំហែងបំបែកប្រទេសនេះ។ ជ័យជម្នះនេះកើតឡើងក្រោយពេលកងទ័ពដែលធ្លាប់ជាប់គាំង បានដណ្តើមយកទឹកដីមកវិញបណ្តើៗ ពីកងកម្លាំងគាំទ្ររហ័ស នៅភាគកណ្តាលប្រទេស។
គួរបញ្ជាក់ថា ស្ថានភាពនៅក្នុងប្រទេសស៊ូដង់ ត្រូវបានអង្គការសហប្រជាជាតិចាត់ទុកថាជាវិបត្តិមនុស្សធម៌ដ៏ធំបំផុតមួយក្នុងពិភពលោក ដោយមានរបាយការណ៍អំពីគ្រោះទុរ្ភិក្សនៅក្នុងតំបន់មួយចំនួន និងការរីករាលដាលនៃជំងឺនៅទូទាំងប្រទេស ដែលមានប្រជាជនចំនួន ៥០ លាននាក់ ដែលកំពុងត្រូវការជំនួយជាបន្ទាន់។ ជម្លោះដែលបានផ្ទុះឡើងកាលពីពីរឆ្នាំមុន បានរារាំងផែនការផ្លាស់ប្តូរទៅកាន់ប្រព័ន្ធប្រជាធិបតេយ្យនៅក្នុងប្រទេស។
ការប្រឈមមុខដាក់គ្នារវាងកងទ័ព និងកងកម្លាំងគាំទ្ររហ័ស (RSF) បានកើតចេញពីការប្រជែងដណ្តើមអំណាចរវាងមេដឹកនាំរបស់ពួកគេ គឺលោក Abdel Fattah al-Burhan និងលោក Mohamed Hamdan Dagalo ទោះបីជាពួកគេធ្លាប់ជាសម្ព័ន្ធមិត្តក្នុងការផ្ដួលរំលំអតីតប្រធានាធិបតី Omar al-Bashir ក្នុងឆ្នាំ ២០១៩ ក៏ដោយ។ សហគមន៍អន្តរជាតិកំពុងជំ
