(ម៉ាឌ្រីដ)៖ ភ្លៀងធ្លាក់ខ្លាំងរយៈពេល ៣សប្តាហ៍ជាប់ៗគ្នា បណ្តាលឱ្យមនុស្សពីរនាក់បាត់ខ្លួន និងរាប់រយនាក់ផ្សេងទៀត ត្រូវបានជម្លៀសចេញ នៅតំបន់ Andalusia ភាគខាងត្បូងប្រទេសអេស្ប៉ាញ ជាកន្លែងដែលទឹកទន្លេហក់ឡើង ឬប្រឈមមុខនឹងហានិភ័យ។ នេះបើយោងតាមការចេញផ្សាយដោយទីភ្នាក់ងារសារព័ត៌មា​ន Reuters នៅថ្ងៃពុធ ទី១៩ ខែមីនា​ ឆ្នាំ ២០២៥។

អភិបាលតំបន់ Andalusia លោក Juan Manuel Moreno បានឱ្យដឹងថា មនុស្សពីរនាក់បានបាត់ខ្លួន នៅក្នុងទីក្រុង Seville ហើយស្នើសុំឱ្យអ្នកស្រុកបន្តប្រុងប្រយ័ត្ន ទោះបីជាភ្លៀងបានថមថយក៏ដោយ។ អាជ្ញាធរ​ជឿថា អ្នកបាត់ខ្លួន ដែលជាគូស្នេហ៍​ ​បានព្យាយាម​ឆ្លង​ជ្រោះ​មួយ ហើយ​ប្រហែលជា​ត្រូវ​ទឹក​គួចយកទៅ​។ រថយន្ត​​ពួកគេ​ត្រូវ​បាន​គេ​ប្រទះ​ឃើញ​ក្រឡាប់​ នៅ​ក្បែរ​នោះ។ តាមអាជ្ញាធរក្នុងតំបន់ ពលរដ្ឋសរុបចំនួន ៣៦៨គ្រួសារត្រូវបានជម្លៀសចេញ ដែលជាវិធានការបង្ការនៅក្នុងខេត្ត Malaga។ ទីប្រជុំជនមួយក្នុងចំណោមទីប្រជុំជនផ្សេងទៀត នៃទីក្រុង Cartama មានមនុស្សប្រហែល ២០នាក់ និងសត្វចិញ្ចឹមរបស់ពួកគេ ត្រូវបានជួយសង្គ្រោះចេញពីផ្ទះដែលរងការជន់លិច។

គួរបញ្ជាក់ថា ប្រជាជនអេស្ប៉ាញ មិនទាន់បាត់ការភ័យខ្លាចនៅឡើយទេ បន្ទាប់ពីភ្លៀងធ្លាក់ខ្លាំងកាលពី ៤ខែមុននៅក្នុងតំបន់ Valencia ភាគខាងកើត នាំឱ្យមកនូវគ្រោះមហន្តរាយធម្មជាតិដ៏សាហាវបំផុត មិនធ្លាប់មានរយៈពេលច្រើនទសវត្សរ៍។ មនុស្ស​ជា​ច្រើន​បាន​បន្ទោសទៅលើ​មន្ត្រី​តំបន់ និង​ថ្នាក់ជាតិ​ថា មានការ​យឺតយ៉ាវ​ក្នុង​ការ​ជូន​ដំណឹង​បន្ទាន់ដល់ពួកគេ៕