(ម៉ូស្គូ)៖ វិមានក្រឹមឡាំង បានច្រានចោលការចោទប្រកាន់របស់លោកខាងលិច ដែលថា រុស្ស៊ីបានធ្វើសកម្មភាពបំផ្លិចបំផ្លាញនៅសហរដ្ឋអាមេរិក និងអឺរ៉ុប ដោយអះអាងថាការចោទប្រកាន់ទាំងនោះគឺ «គ្មានខ្លឹមសារ» និង «មិនពិត» ហើយគ្មានភស្តុតាងបញ្ជាក់។ នេះបើតាមការលើកឡើងរបស់អ្នកនាំពាក្យវិមានក្រឹមឡាំង លោក Dmitry Peskov ដែលត្រូវបានចុះផ្សាយដោយ ទីភ្នាក់ងារសារព័ត៌មាន Reuters។
លោក Peskov បានធ្វើអត្ថាធិប្បាយនេះ ជាការឆ្លើយតបទៅនឹងរបាយការណ៍ដែលថា សហរដ្ឋអាមេរិកបានផ្អាកវិធានការមួយចំនួន ក្នុងការប្រឆាំងនឹងយុទ្ធនាការបំផ្លិចបំផ្លាញដែលចោទថារុស្ស៊ីជាអ្នកប្រព្រឹត្ត។ លោកបានបញ្ជាក់ថា «គ្មានភស្តុតាងណាមួយដែលបញ្ជាក់ពីវត្តមាននៃយុទ្ធនាការបំផ្លិចបំផ្លាញ ដែលត្រូវបានគេរកឃើញនោះទេ ទោះបីជាមានកិច្ចខិតខំប្រឹងប្រែងតាមផ្លូវច្បាប់ នៅសហរដ្ឋអាមេរិក និងបណ្តាប្រទេសអឺរ៉ុបក៏ដោយ»។
លោក Peskov បានបន្ថែមថា រដ្ឋបាលរបស់ប្រធានាធិបតី លោក ដូណាល់ ត្រាំ កំពុងតែព្យាយាមកម្ចាត់ចោលនូវអ្វីដែល «គ្មានប្រសិទ្ធភាព ពុករលួយ និងមិនអាចជឿទុកចិត្តបាន» ហើយលោកយល់ថាសកម្មភាពនេះគឺអាចយល់បាន។
គួរបញ្ជាក់ថា ការអត្ថាធិប្បាយរបស់វិមានក្រឹមឡាំងនេះ ធ្វើឡើងចំពេលមានការចោទប្រកាន់ពីលោកខាងលិចថា រុស្ស៊ីបានធ្វើយុទ្ធនាការបំផ្លិចបំផ្លាញ រួមទាំងការវាយប្រហារលើហេដ្ឋារចនាសម្ព័ន្ធថាមពល។ ប្រធានចារកម្មអង់គ្លេស ធ្លាប់បានហៅយុទ្ធនាការនេះថា មានហានិភ័យខ្ពស់ដែលអាចបង្កគ្រោះថ្នាក់ធ្ងន់ធ្ងរ។ ហើយថ្មីៗនេះ ជនជាតិប៊ុលហ្គារីបីនាក់ត្រូវបានកាត់ទោសនៅទីក្រុងឡុងដ៍ពីបទចារកម្មឲ្យរុស្ស៊ី។
ទោះជាយ៉ាងណា រុស្ស៊ីតែងតែបដិសេធរាល់ការពាក់ព័ន្ធនឹងផែនការ ឬសកម្មភាពបំផ្លិចបំផ្លាញណាមួយ៕
