(មូស្គូ)៖​ នៅថ្ងៃសៅរ៍​ ទី៨​ ខែមីនា​ ក្រសួងការពារជាតិរុស្ស៉ីបានអះអាងថា កងទ័ពរបស់ខ្លួនបានដណ្តើមយកភូមិ Viktorovka, Nikolaevka និង Staraya Sorochina នៅតំបន់ Kursk ភាគខាងលិចនៃប្រទេស​ ពីកងកម្លាំងអ៊ុយក្រែនមកវិញ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន​ Reuters។

កងទ័ពរុស្ស៉ីបាននិងកំពុងប្រយុទ្ធ​ដើម្បីបណ្តេញកងទ័ពអ៊ុយក្រែនចេញពីទីក្រុងនៃតំបន់ Kursk ចាប់តាំងពីខែសីហាឆ្នាំមុន នៅពេលដែលកងកម្លាំងទីក្រុងកៀវ​ បេីកការលុកលុយឆ្លងព្រំដែន និងដណ្តើមកាន់កាប់ទឹកដីរុស្ស៉ីបានមួយផ្នែក។

តាមកម្មវិធីផែនទី​ បានបង្ហាញក្នុងសប្តាហ៍នេះថា ទីតាំងរបស់អ៊ុយក្រែនកាន់តែយ៉ាប់យ៉ឺនខ្លាំងនៅក្នុងទីក្រុង Kursk ជាកន្លែងដែលកងទ័ពរបស់ខ្លួន​ជិតត្រូវបានឡោមព័ទ្ធដោយកងកម្លាំងរុស្ស៉ី។

អ្នកសរសេរប្លុកសង្គ្រាមគាំទ្ររុស្ស៉ី​ បានឱ្យដឹងថា​ កងទ័ពរុស្ស៉ីចាប់ផ្តើមវាយលុកលើទីក្រុង Sudzha ដែលជាទីក្រុងសំខាន់មួយចម្ងាយប្រហែល ៩គីឡូម៉ែត្រពីព្រំដែន ហើយថាស្ថានភាពកងទ័ពអ៊ុយក្រែននៅ Kursk គឺជិតដល់កម្រិតធ្ងន់ធ្ងរ។

Reuters មិនអាចផ្ទៀងផ្ទាត់ព័ត៌មាននេះដោយឯករាជ្យបានទេ​ ខណៈមិនទាន់មានការបញ្ជាក់ពីអ៊ុយក្រែន៕