(ប្រ៊ុចសែល)៖ ក្នុងកិច្ចប្រជុំកំពូលមួយនៅទីក្រុងប្រ៊ុចសែល នៅថ្ងៃព្រហស្បតិ៍នេះ មេដឹកនាំសហភាពអឺរ៉ុប (EU) ត្រូវបានគេរំពឹងថានឹងអនុម័តលើការបង្កើនការចំណាយលើវិស័យការពារជាតិរបស់ប្លុក និងបញ្ជាក់ឡើងវិញពីការគាំទ្ររបស់ខ្លួនចំពោះប្រទេសអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៦ ខែមីនា ឆ្នាំ២០២៥។
ការសម្រេចចិត្តនេះធ្វើឡើងបន្ទាប់ពីប្រធានាធិបតីអាមេរិក ដូណាល់ ត្រាំ បានផ្អាកជំនួយយោធាដល់អ៊ុយក្រែន ដែលបង្កឲ្យមានក្តីបារម្ភថា EU មិនអាចពឹងលើការការពារពីអាមេរិកបានទាំងស្រុងទៀតទេ។
ប្រធានាធិបតីអ៊ុយក្រែន Volodymyr Zelenskiy នឹងចូលរួមក្នុងកិច្ចប្រជុំកំពូលជាមួយមេដឹកនាំនៃប្រទេសសមាជិក EU ទាំង ២៧។ ទោះជាយ៉ាងណា មេដឹកនាំជាតិនិយមហុងគ្រី លោក Viktor Orban ដែលជាសម្ព័ន្ធមិត្តរបស់លោក Trump អាចនឹងប្រើសិទ្ធិវេតូលើសេចក្តីថ្លែងការណ៍រួមដែលគាំទ្រអ៊ុយក្រែន។
ម្យ៉ាងវិញទៀត បើទោះបីជាកិច្ចប្រជុំកំពូល នឹងបង្ហាញពីការគាំទ្រផ្នែកពាក្យសម្ដី និងផែនការសម្រាប់ការបង្កើនការចំណាយលើវិស័យការពារជាតិក៏ដោយ ក៏ EU មិនត្រូវបានគេរំពឹងថានឹងអាចជំនួសជំនួយរបស់សហរដ្ឋអាមេរិកទាំងស្រុងបានដែរ។ តាមតួលេខរបស់អង្គការណាតូ វ៉ាស៊ីនតោនបានផ្តល់ជំនួយយោធាដល់អ៊ុយក្រែនជាង ៤០ភាគរយ កាលពីឆ្នាំមុន ដែលមួយចំនួនក្នុងនោះអឺរ៉ុបមិនមានសមត្ថភាពផ្គត់ផ្គង់បានដោយងាយនោះទេ។
កិច្ចប្រជុំកំពូលនេះធ្វើឡើងចំពេលដែលមានការផ្លាស់ប្តូរគោលនយោបាយការពារជាតិដ៏សំខាន់នៅអឺរ៉ុប ដោយសារការព្រួយបារម្ភថារុស្ស៊ីអាចនឹងវាយប្រហារប្រទេសសមាជិក EU បន្ទាប់ពីសង្គ្រាមនៅអ៊ុយក្រែន ហើយថាអឺរ៉ុបមិនអាចពឹងផ្អែកលើជំនួយពីសហរដ្ឋអាមេរិកបានទៀតទេ។
ក្នុងសុន្ទរកថាទៅកាន់ប្រជាជាតិបារាំងមុនកិច្ចប្រជុំកំពូល ប្រធានាធិបតីបារាំង Emmanuel Macron បានលើកឡើងពីសារៈសំខាន់នៃការត្រៀមខ្លួនរបស់អឺរ៉ុបក្នុងករណីដែលសហរដ្ឋអាមេរិកមិនអាចបន្តគាំទ្របាន។ លោកថែមទាំងបានលើកឡើងពីលទ្ធភាពនៃការពិភាក្សាអំពីការពង្រីកការការពារដែលផ្ដល់ដោយឃ្លាំងអាវុធនុយក្លេអ៊ែររបស់បារាំងដល់ដៃគូអឺរ៉ុបរបស់ខ្លួន៕
