(អង់ការ៉ា)៖ ប្រទេសតួកគី ដែលមានកងទ័ពធំជាងគេទីពីរក្នុងអង្គការណាតូ (NATO) បន្ទាប់ពីសហរដ្ឋអាមេរិក អាចនឹងចូលរួមក្នុងបេសកកម្មរក្សាសន្តិភាពនៅអ៊ុយក្រែន ប្រសិនបើមានកិច្ចព្រមព្រៀងសន្តិភាពរវាងរុស្ស៊ី និងអ៊ុយក្រែន។ នេះបើតាមប្រភពពីក្រសួងការពារជាតិតួកគី ដែលត្រូវបានចុះផ្សាយដោយទីភ្នាក់ងារសារព័ត៌មាន Reuters។
ប្រភពដដែលបានបញ្ជាក់ថា ការចូលរួមចំណែករបស់តួកគីក្នុងបេសកកម្មនេះនឹងត្រូវពិចារណា ប្រសិនបើចាំបាច់ដើម្បីធានាស្ថិរភាព និងសន្តិភាពក្នុងតំបន់ ហើយនឹងត្រូវវាយតម្លៃដោយផ្អែកលើកិច្ចពិភាក្សាជាមួយគ្រប់ភាគីពាក់ព័ន្ធ។
ការលើកឡើងនេះកើតឡើងបន្ទាប់ពីមហាអំណាចយោធាអឺរ៉ុបដូចជា អង់គ្លេស និងបារាំង បានពិភាក្សារួចហើយអំពីលទ្ធភាពនៃការដាក់ពង្រាយកងទ័ព ដើម្បីតាមដានបទឈប់បាញ់នៅអ៊ុយក្រែន ក្រោយមានកិច្ចព្រមព្រៀងសន្តិភាព។ ទោះជាយ៉ាងណា សហរដ្ឋអាមេរិកបានបញ្ជាក់ថាខ្លួននឹងមិនបញ្ជូនកងទ័ពអាមេរិកទៅចូលរួមក្នុងបេសកកម្មនេះទេ។
អ៊ុយក្រែនបានអះអាងថា កិច្ចព្រមព្រៀងសន្តិភាពណាមួយត្រូវតែមានវត្តមានកងកម្លាំងដ៏រឹងមាំនៅនឹងកន្លែងដើម្បីធានាសន្តិសុខ។ រុស្ស៊ីបានបដិសេធរាល់ការដាក់ពង្រាយកងកម្លាំងណាតូ ប៉ុន្តែប្រធានាធិបតីអាមេរិក ដូណាល់ ត្រាំ ជឿជាក់ថារុស្ស៊ីអាចនឹងយល់ព្រម។
គួរបញ្ជាក់ថា ការពិភាក្សាអំពីការដាក់ពង្រាយកងទ័ពតួកគី នៅតែស្ថិតក្នុងដំណាក់កាលពិចារណានៅឡើយ ដោយមិនទាន់មានការសម្រេចចិត្តចុងក្រោយនោះទេ នេះបើតាមប្រភពពីប្រទេសតួកគី។ ប្រភពដដែលបានគូសបញ្ជាក់ថា បទឈប់បាញ់រវាងអ៊ុយក្រែន និងរុស្ស៊ី គឺជាលក្ខខណ្ឌចាំបាច់មុន ហើយការដាក់ពង្រាយដំបូង នឹងកំណត់ត្រឹមតែអង្គភាពមិនចូលរួមប្រយុទ្ធ ដើម្បីត្រួតពិនិត្យបទឈប់បាញ់ប៉ុណ្ណោះ។
តួកគីរក្សាទំនាក់ទំនងជិតស្និទ្ធជាមួយទាំងរុស្ស៊ី និងអ៊ុយក្រែនតាំងពីដើមសង្គ្រាមមក ទោះបីជាតួកគីជាគូប្រជែងជាប្រវត្តិសាស្ត្ររបស់រុស្ស៊ីក៏ដោយ។ តួកគីបានបដិសេធមិនចូលរួមក្នុងការដាក់ទណ្ឌកម្មរបស់លោកខាងលិចប្រឆាំងនឹងរុស្ស៊ី ហើយធ្លាប់បានសម្របសម្រួលកិច្ចព្រមព្រៀងរវាងអ៊ុយក្រែននិងរុស្ស៊ីកាលពីពេលកន្លងមក ដូចជាកិច្ចព្រមព្រៀងអនុញ្ញាតឲ្យអ៊ុយក្រែននាំចេញគ្រាប់ធញ្ញជាតិតាមសមុទ្រខ្មៅ៕
