(កៀវ)៖ បីឆ្នាំបន្ទាប់ពីរុស្ស៊ីឈ្លានពានអ៊ុយក្រែន មេបញ្ជាការយោធាទទួលបន្ទុកប្រព័ន្ធគ្មានមនុស្សបើករបស់អ៊ុយក្រែនបានព្រមានថា កងកម្លាំងប្រដាប់អាវុធរបស់អង្គការណាតូ (NATO) មិនទាន់មានការត្រៀមខ្លួនគ្រប់គ្រាន់សម្រាប់សង្គ្រាមដ្រូនទំនើបនៅឡើយទេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី៥ ខែមីនា ឆ្នាំ ២០២៥។
លោកវរសេនីយ៍ឯក Vadym Sukharevskyi ប្រធានកងកម្លាំងប្រព័ន្ធគ្មានមនុស្សបើករបស់អ៊ុយក្រែនបានថ្លែងថា ទីក្រុងកៀវកំពុងព្យាយាមនាំមុខរុស្ស៊ីក្នុងការអភិវឌ្ឍបច្ចេកវិទ្យាដ្រូន ដោយប្រើប្រាស់បញ្ញាសិប្បនិម្មិត (AI) ការដាក់ពង្រាយយន្តហោះគ្មានមនុស្សបើកជាក្រុម (swarming) និងការសាកល្បងបច្ចេកវិទ្យាឡាស៊ែរដើម្បីបាញ់ទម្លាក់ដ្រូនរបស់សត្រូវ។
ក្នុងបទសម្ភាសន៍ជាមួយទីភ្នាក់ងារសារព័ត៌មាន Reuters លោក Sukharevskyi បានថ្លែងថា «តាមអ្វីដែលខ្ញុំឃើញនិងឮ មិនមានកងទ័ពណាតូណាមួយ បានត្រៀមខ្លួនរួចរាល់ដើម្បីទប់ទល់នឹងការគំរាមកំហែងពីយន្តហោះគ្មានមនុស្សបើកនោះទេ»។
លោកបានសង្កត់ធ្ងន់លើសារៈសំខាន់ផ្នែកសេដ្ឋកិច្ចនៃការប្រើប្រាស់ដ្រូន ដោយលើកឡើងថា ជាញឹកញាប់តម្លៃផលិតដ្រូនមានតម្លៃទាបជាងតម្លៃអាវុធធម្មតាដែលប្រើដើម្បីបាញ់ទម្លាក់វា។ លោកបានចោទជាសំណួរអំពីតម្លៃនៃការប្រើប្រាស់មីស៊ីលស្ទាក់ចាប់ដែលមានតម្លៃរាប់សែន ឬរាប់លានដុល្លារដើម្បីបាញ់ទម្លាក់ដ្រូនដែលមានតម្លៃត្រឹមតែប៉ុន្មានពាន់ ឬប៉ុន្មានម៉ឺនដុល្លារ។
ការលើកឡើងរបស់លោក Sukharevskyi ធ្វើឡើងខណៈដែលប្រទេសសមាជិកណាតូមួយចំនួននៅអឺរ៉ុប កំពុងបង្កើនការចំណាយលើវិស័យការពារជាតិដើម្បីត្រៀមខ្លួនសម្រាប់លទ្ធភាពដែលសង្គ្រាមនៅអ៊ុយក្រែនអាចនឹងអូសបន្លាយ ឬកាន់តែធ្ងន់ធ្ងរ។
គួរបញ្ជាក់ថា ចាប់តាំងពីរុស្ស៊ីឈ្លានពានអ៊ុយក្រែនក្នុងឆ្នាំ ២០២២ ការប្រើប្រាស់យន្តហោះគ្មានមនុស្សបើក ឬហៅថា ដ្រូន បានកើនឡើងយ៉ាងខ្លាំង។ អ៊ុយក្រែនអះអាងថាខ្លួននឹងផលិតយន្តហោះគ្មានមនុស្សបើកប្រភេទ First Person View (FPV) ខ្នាតតូចចំនួន ២,២ លានគ្រឿង និងយន្តហោះគ្មានមនុស្សបើកធុនធំនិងរយៈចម្ងាយឆ្ងាយចំនួន ១០០,០០០ គ្រឿងក្នុងឆ្នាំ ២០២៤។ រុស្ស៊ីធ្លាប់បានប៉ាន់ប្រមាណថានឹងផលិតយន្តហោះគ្មានមនុស្សបើក FPV ចំនួន ១,៤ លានគ្រឿងក្នុងឆ្នាំដដែល។
លោក Sukharevskyi បានបន្ថែមថា ជាង ៦០ភាគរយ នៃគោលដៅត្រូវបានបំផ្លាញដោយយន្តហោះគ្មានមនុស្សបើក ដែលបង្ហាញពីសារៈសំខាន់នៃបច្ចេកវិទ្យានេះនៅលើសមរភូមិ។ លោកបានបញ្ជាក់ថា បញ្ហាសំខាន់គឺការអភិវឌ្ឍយុទ្ធសាស្ត្រក្នុងការប្រើប្រាស់ដ្រូន និងការវិវត្តនៃបច្ចេកវិទ្យាដែលពាក់ព័ន្ធ៕
