(ឡុងដ៍)៖ ចក្រភពអង់គ្លេស បានប្រកាសកាលពីថ្ងៃចន្ទថា សំណើបទឈប់បាញ់នៅអ៊ុយក្រែនជាច្រើនកំពុងស្ថិតក្រោមការពិចារណា បន្ទាប់ពីបារាំងបានលើកឡើងពីលទ្ធភាពនៃបទឈប់បាញ់រយៈពេលមួយខែដំបូង ដើម្បីបើកផ្លូវសម្រាប់កិច្ចចរចាសន្តិភាព។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ដោយមិនបានបញ្ជាក់លម្អិត អ្នកនាំពាក្យរបស់នាយករដ្ឋមន្ត្រីអង់គ្លេស បានថ្លែងថា «មានជម្រើសជាច្រើននៅលើតុ»។ ការលើកឡើងនេះកើតឡើងបន្ទាប់ពីបណ្ដាប្រទេសនៅអឺរ៉ុប ដែលដឹកនាំដោយអង់គ្លេស និងបារាំង កំពុងពិនិត្យមើលជម្រើស សម្រាប់សំណើសន្តិភាពរួមមួយសម្រាប់អ៊ុយក្រែន។ កិច្ចពិភាក្សានេះកើតឡើងក្រោយពីមានភាពរកាំរកូស ក្នុងជំនួបរវាងប្រធានាធិបតីអាមេរិក ដូណាល់ ត្រាំ និងប្រធានាធិបតីអ៊ុយក្រែន Volodymyr Zelenskiy កាលពីសប្ដាហ៍មុន។
កាលពីថ្ងៃអាទិត្យកន្លងទៅនេះ លោក Starmer បានរៀបចំកិច្ចប្រជុំកំពូលមេដឹកនាំអឺរ៉ុបនៅទីក្រុងឡុងដ៍ ហើយបានប្រកាសថា មេដឹកនាំអឺរ៉ុបបានឯកភាពគ្នារៀបចំផែនការសន្តិភាពសម្រាប់អ៊ុយក្រែន ដើម្បីបង្ហាញដល់សហរដ្ឋអាមេរិក។
ក្នុងបទសម្ភាសន៍មួយមុនកិច្ចប្រជុំកំពូល ប្រធានាធិបតីបារាំង Emmanuel Macron បានលើកពីលទ្ធភាពនៃបទឈប់បាញ់រយៈពេលមួយខែ។ រដ្ឋមន្ត្រីការបរទេសបារាំង លោក Jean-Noel Barrot បានបញ្ជាក់បន្ថែមកាលពីថ្ងៃចន្ទថា បទឈប់បាញ់លើហេដ្ឋារចនាសម្ព័ន្ធផ្លូវអាកាស សមុទ្រ និងថាមពលនឹងអាចឱ្យភាគីពាក់ព័ន្ធវាយតម្លៃពីភាពស្មោះត្រង់របស់ប្រធានាធិបតីរុស្ស៊ី Vladimir Putin ក្នុងការប្តេជ្ញាចំពោះបទឈប់បាញ់។ លោកបានបន្ថែមថា ពេលនោះហើយដែលកិច្ចចរចាសន្តិភាពពិតប្រាកដអាចចាប់ផ្ដើមបាន។
គួរបញ្ជាក់ថា បារាំង អង់គ្លេស និងប្រទេសអឺរ៉ុបមួយចំនួនទៀត បានលើកពីលទ្ធភាពនៃការបញ្ជូនទាហានទៅអ៊ុយក្រែន ក្នុងករណីមានបទឈប់បាញ់ ប៉ុន្តែបានបញ្ជាក់ថា ពួកគេចង់បានការគាំទ្រខ្លះពីសហរដ្ឋអាមេរិក។
លោក Zelenskiy បានទទូចថា បទឈប់បាញ់ណាមួយត្រូវតែមានការធានាសន្តិសុខច្បាស់លាស់ពីលោកខាងលិច ដើម្បីធានាថា រុស្ស៊ីដែលបានឈ្លានពានអ៊ុយក្រែនកាលពីបីឆ្នាំមុន និងកាន់កាប់ប្រហែល ២០% នៃទឹកដីរបស់ខ្លួន នឹងមិនធ្វើការវាយប្រហារម្ដងទៀតឡើយ។ ទោះយ៉ាងណា លោក ត្រាំ បានបដិសេធមិនផ្ដល់ការធានាបែបនេះទេ៕
