(វ៉ាស៊ីនតោន)៖ នាយកប្រតិបត្តិ (CEO) ក្រុមហ៊ុន Netflix​ លោក Reed Hastings បាននិយាយថា លោកពិតជាពេញចិត្តចំពោះគំរោងទិញយកក្រុមហ៊ុន Time Warner ពីសំណាក់ក្រុមហ៊ុន AT&T​ ក្នុងតម្លៃដល់ទៅ ៨៥.៤ពាន់លានដុល្លារ ​ព្រោះថានឹងផ្ដល់ឱ្យក្រុមហ៊ុនបម្រើប្រព័ន្ធផ្សាយភាពយន្តដ៏មានប្រជាប្រិយរបស់លោក កាន់តែប្រើសើរឡើង។​ នេះបើយោងតាមការចេញផ្សាយ របស់សារព័ត៌មាន Reuters ​នៅរសៀលថ្ងៃអង្គារ ទី២៥ ខែតុលា ឆ្នាំ២០១៦។

ការលើកឡើងបែបនេះរបស់លោក Reed Hastings ធ្វើឡើងបន្ទាប់ពីមានពាក្យចចាមអារ៉ាមថា ក្រុមហ៊ុន Netflix អាចនឹងក្លាយជាគោលដៅទិញនៅពេលបន្ទាប់។

ថ្លែងនៅក្នុងសន្និសីទស្ដីពីបចេ្ចកវិទ្យារៀបចំឡើង ដោយ Wall Street Journal នៅក្នុងទីក្រុង Laguna Beach នៃរដ្ឋ California ​លោក Reed Hastings បានលើកឡើងដូច្នេះថា «វាពិតជាមាន​សំខាន់ណាស់ដែល ប្រធានបទពាក់ព័ន្ធនឹង Netflix​ ត្រូវគេចាត់ទុក ដូចជាកិច្ចព្រមព្រៀងទិញរបស់ Time Warner ហើយយើងពិតជាចូលចិត្តបើសិនវា ជាការប្រកួតប្រជែងដោយ​បើកជំហរ»

គួរបញ្ជាក់ថាបន្ទាប់ពីក្រុមហ៊ុន AT&T​ បានចំណាយប្រាក់ ៨៥.៤ពាន់លានដុល្លារទិញយកក្រុមហ៊ុន Time Warner ក៏ដូចជា មានគំរោងទិញយកសិទ្ធិជាម្ចាស់ស្ថានីយ៍ទូរទស្សន៍ CNN និង HBO ក្នុងតម្លៃ១០៨.៧ពាន់ លានដុល្លារ ព្រមទំាងការរំពឹងទុកថា ការលក់របស់ក្រុមហ៊ុន Netflix នឹងធ្លាក់ចុះប្រឈមមុខនឹងការប្រកួតប្រជែងជាមួយក្រុមហ៊ុន Hulu និងក្រុមហ៊ុន Amazon បានធ្វើឱ្យលេច​លឺពាក្យចចាមអារ៉ាមថា ក្រុមហ៊ុន Netflix អាចនឹងក្លាយគោលដៅទិញ នៅពេលបន្ទាប់ពីក្រុមហ៊ុន AT&T​ ៕